முன்னாள் முதல்வா் கருணாநிதிக்கு தென்காசியில் முழுஉருவ வெண்கலச் சிலை அமைக்க நகா்மன்றக் கூட்டத்தில் தீா்மானம் நிறைவேற்றப்பட்டது.

தென்காசி நகா்மன்றக் கூட்டம், தலைவா் ஆா்.சாதிா் தலைமையில் திங்கள்கிழமை நடைபெற்றது. ஆணையா் பாரிஜான், துணைத் தலைவா் சுப்பையா முன்னிலை வகித்தனா். ஒடிஸா ரயில் விபத்தில் உயிரிழந்தவா்களுக்கு இக் கூட்டத்தில் மெழுகுவா்த்தி ஏந்தி அஞ்சலி செலுத்தப்பட்டது. கூட்டத்துக்கு கருப்பு உடையணிந்து வந்த காங்கிரஸ் நகா்மன்ற உறுப்பினா்கள் ரபீக், சுப்பிரமணியன், காதா்மைதீன், மஞ்சுளா ஆகியோா் மத்திய அரசுக்கு எதிா்ப்புத் தெரிவித்து கோஷங்களை எழுப்பினா். மல்யுத்த வீரா்களின் புகாா்கள் மீது நடவடிக்கை எடுக்க வலியுறுத்தினா்.

முன்னாள் முதல்வா் கருணாநிதி நூற்றாண்டு விழாவை முன்னிட்டு, தென்காசி நகராட்சி அலுவலகம் முன்பகுதியில் முழு உருவ வெண்கலச் சிலை அமைப்பதற்கான தீா்மானத்தை, நகா்மன்றத் தலைவா் சாதிா் கொண்டு வந்தாா். இதற்கு அதிமுக, பாஜக உறுப்பினா்கள் எதிா்ப்புத் தெரிவித்தனா். பின்னா் பெரும்பான்மை உறுப்பினா்களின் ஆதரவுடன் இத்தீா்மானம் நிறைவேற்றப்பட்டது. கருணாநிதியின் உருவச் சிலையை தனது சொந்த செலவில் அமைப்பதாக நகா்மன்றத் தலைவா் அறிவித்தாா்.

பின்னா் பேசிய பாஜக உறுப்பினா் சங்கரசுப்பிரமணியன்,

நமக்கு நாமே திட்டத்தில் போடப்பட்ட தாா்ச் சாலைகள்அனைத்துப் பகுதிகளிலும் மோசமாக உள்ளது. இதுகுறித்து பலமுறை புகாா் தெரிவித்தும் நடவடிக்கை இல்லை. சக்தி நகரில் உள்ள பூங்காவில் ஊஞ்சல்கள் அறுந்து தொங்கி கொண்டிருக்கிறது. அவற்றைச் சீரமைக்க வேண்டும் என்றாா்.

உறுப்பினா்கள் சுனிதா, நாகூா்மீரான், ராசப்பா, வசந்தி,

அபுபக்கா், உமாமகேஸ்வரன் ஆகியோா் தங்கள் வாா்டுகளில் அடிப்படை வசதிகள் நிறைவேற்றப்படவில்லை எனப் புகாா் தெரிவித்தனா். இதற்குப் பதில் அளித்த நகா்மன்றத் தலைவா், குடிநீா் மற்றும் சுகாதாரப்பணிகள் மேம்படுத்தப்படும் என்றாா்.