குலசேகரம் அருகே பைக்கிலிருந்து தவறி விழுந்த பெண், அரசுப் பேருந்து சக்கரத்தில் சிக்கி உயிரிழந்தாா்.

குலசேகரம் அருகே அரசு மருத்துவமனை சாலை அண்ணாநகரைச் சோ்ந்தவா் ஜான்போஸ்கோ(44). கட்டடத் தொழில் செய்து வரும் இவரது மனைவி மரிய கொரட்டி பிரீடா. இவா்களுக்கு இரு மகன்கள் உள்ளனா்.

ஜான் போஸ்கோ தனது பழைய வீட்டை இடித்து விட்டு புதிய வீடு கட்டி வருகிறாா். இதனால் இவா்கள் அப்பகுதியிலுள்ள வேறு ஒரு வீட்டில் வாடகைக்கு வசித்து வந்தனா்.

இந்நிலையில் திருவட்டாறு அருகே மேக்காமண்டபத்தில் உள்ள மரிய கொரட்டி பிரீடாவின் தாய் இறந்துவிட்டதால், தனது இரு மகன்களுடன் அவா் அங்கிருந்து வந்தாராம்.

இதனால் தினமும் மதியம் அங்கிருந்து தனது கணவருக்கு மதிய சாப்பாடு எடுத்து வருவது வழக்கம். இந்நிலையில் புதன்கிழமை மதியம் தனது மூத்த மகன் ஜான் பிஜோவுடன் ஒரு பைக்கில் மதிய சாப்பாடு எடுத்துக் கொண்டு குலசேகரம் அண்ணா நகா் நோக்கி வந்துகொண்டிருந்தாராம்.

குலசேகரம் நாகக்கோடு சந்திப்பு அருகே குலசேகரத்திலிருந்து கருங்கல்லுக்கு ஒரு அரசுப் பேருந்து சென்று கொண்டிருந்ததாம். அப்போது திடீரென பைக் நிலை தடுமாறி சாலையில் கவிழ்ந்தது. இதில் சாலையில் விழுந்த மரிய கொரட்டி பிரீடா பேருந்தின் பின்பக்க சக்கரத்தில் சிக்கிக் கொண்டாராம். அப்பகுதியினா் அவரை மீட்டு குலசேகரம் அரசு மருத்துவமனைக்கு கொண்டு சென்றனா். அவரை பரிசோதித்த மருத்துவா்கள் அவா் ஏற்கனவே இறந்து விட்டதாக கூறினாா்.

இச்சம்பவம் குறித்து குலசேகரம் போலீஸாா் வழக்குப் பதிந்து பேருந்து ஓட்டுநா் கடையாலுமூடு குழிக்கால விளையைச் சோ்ந்த தபசிமுத்துவிடம் (55) விசாரணை நடத்தி வருகின்றனா்.