கன்னியாகுமரி மாவட்டம், வேளிமலை பகுதியில் ரப்பா் ஆராய்ச்சி மையம் அமைக்கப்படும் என தமிழக தகவல் தொழில்நுட்பத் துறை அமைச்சா் த. மனோதங்கராஜ் தெரிவித்தாா்.
மக்களின் கோரிக்கைகள், பிரச்னைகளுக்கு தீா்வு காணும் வகையில் குறிப்பிட்ட இடத்தில் அதிகாரிகள் குழுவுடன் சென்று
மக்களிடம் இருந்து மனுக்களை பெற்று உடனடியாக அதற்கான தீா்வு காணும் ‘தீா்வு தளம்’ எனும் திட்டம் கன்னியாகுமரி மாவட்டம், திற்பரப்பு, பொன்மனை பேரூராட்சியில் சனிக்கிழமை தொடங்கப்பட்டது.
திற்பரப்பு பேரூராட்சியில் உண்ணியூா் கோணம் அரசு நடுநிலைப் பள்ளி, பொன்மனை பேரூராட்சியில் பொன்மனை அரசு உயா் நிலைப் பள்ளியில் இந்த முகாமை தமிழக தகவல் தொழில்நுட்பத் துறை அமைச்சா் த. மனோ தங்கராஜ் தொடங்கி வைத்தாா். அப்போது அவா் பேசியது: தமிழக அரசு மக்கள் நலத் திட்டங்களை சிறப்பாக நிறைவேற்றி வருகிறது. அரசின் திட்டங்கள் மக்களை சென்றடைய வேண்டும் என்ற வகையில் தீா்வு தளம் முகாம் நடத்தப்படுகிறது. அரசின் திட்டங்கள் அனைத்து மக்களுக்கும் கிடைக்க வேண்டும் என்ற நோக்கியில் இந்த சிறப்பு முகாம் நடத்தப்படுகிறது.
கரோனா காலத்திலும் முதல்வா் மு.க. ஸ்டாலின் செயல்பாடுகள் உலகை திரும்பி பாா்க்க வைத்துள்ளது.
வேளிமலை பகுதியில் 166 ஹெக்டோ் அரசு நிலம் கண்டறியப்பட்டுள்ளது. அங்கு ஒன்றிய அரசின் உதவியுடன் ரப்பா் ஆராய்ச்சி மையம் தொடங்குவதற்கான முயற்சிகள் மேற்கொள்ளப்பட்டுள்ளது. நஷ்டத்தில் இயங்கும் அரசு ரப்பா் கழகத்தை லாபகரமாக இயக்க நடவடிக்கை மேற்கொள்ளப்பட்டுள்ளது. கன்னியாகுமரி மாவட்டத்தை பசுமை மாவட்டமாக மாற்றுவதற்காக சூழியல் சாா்ந்த வளா்ச்சித் திட்டங்கள் செயல்படுத்த இங்கிலாந்து அரசுடன் புரிந்துணா்வு ஒப்பந்தம் ஏற்படுத்த பேச்சுவாா்த்தை நடைபெற்று வருகிறது. இம்மாவட்டத்தில் வேலைவாய்ப்புகளை அதிகரிக்கும்
வகையில் தகவல் தொழில்நுட்ப பூங்கா அமைக்கவும் பூா்வாங்க நடவடிக்கைகள் மேற்கொள்ளப்பட்டுள்ளன என்றாா் அவா்.
முகாமில் பொதுமக்களிடம் இருந்து அமைச்சா் கோரிக்கை மனுக்களை பெற்றுக் கொண்டாா். மனுக்கள் மீது துறை ரீதியாக நடவடிக்கை எடுக்க அதிகாரிகளுக்கு அனுப்பி நடவடிக்கைக்கு பரிந்துரைக்கப்பட்டது. உண்ணியூா்கோணம் முகாமில்
பெறபட்ட 145 மனுக்களில் தகுதியான மனுக்கள் மீது உடனடியாக தீா்வு காணப்பட்டது.
முகாமில், ஆட்சியா் மா. அரவிந்த், பத்மநாபபுரம் சாா்-ஆட்சியா் அலா்மேல் மங்கை, திருவட்டாறு வட்டாட்சியா் ரமேஷ், சிறப்பு வட்டாட்சியா் அனிதாகுமாரி, அரசு அதிகாரிகள், திருவட்டாறு ஒன்றிய திமுக செயலா் ஜாண்சன் உள்ளிட்டோா் பங்கேற்றனா்.