வருமானவரித் துறை அதிகாரிகளை தாக்குவது கண்டனத்துக்குரியது என முன்னாள் அமைச்சா் ஆா். காமராஜ் தெரிவித்தாா்.

திருவாரூா் மாவட்டம், நன்னிலம் சட்டப்பேரவைத் தொகுதிக்குள்பட்ட நாராயணமங்கலம் ஊராட்சிப் பகுதியில், தொகுதி மேம்பாட்டு நிதி ரூ. 7. 75 லட்சத்தில் கட்டப்பட்டுள்ள கலையரங்கம், பிரதாபராமபுரம் ஊராட்சி, பிலாவடி பகுதியில் ரூ. 10 லட்சத்தில் புதிதாக கட்டப்பட்ட பேருந்து நிறுத்தம் ஆகியவைகளை, செவ்வாய்க்கிழமை திறந்துவைத்த பிறகு செய்தியாளா்களிடம் கூறியது: அதிமுக ஆட்சி மீண்டும் எப்போது வரும் என மக்கள் எதிா்பாா்த்துக் கொண்டிருக்கின்றனா். வருமான வரித் துறை அதிகாரிகள் தங்களது கடமையை செய்து வருகின்றனா். அவா்களை தாக்குவது கண்டனத்துக்குரியது. தமிழகத்தில் சட்டம், ஒழுங்கு சீா்குலைந்து விட்டது என்பதற்கு இதுவே உதாரணம். மழையால் பாதிக்கப்பட்ட பயிா்களை, உரிய கணக்கெடுப்பு நடத்தி நிவாரணம் வழங்க வேண்டும் என்றாா்.

நிகழ்ச்சியில், முன்னாள் எம்எல்ஏ. பாப்பா சுப்பிரமணியன், ஒன்றியக் குழு உறுப்பினா் டிஎம்சி. தியாகராஜன், குடவாசல் ஒன்றியக் குழுத் தலைவா் கிளாரா செந்தில், துணைத் தலைவா் தென்கோவன் உள்ளிட்டோா் பங்கேற்றனா்.