மன்னாா்குடி வட்டத்தில் வேளாண் சாா்ந்த துறைகளின் சாா்பில் செயல்படுத்தப்படும் திட்டப் பணிகளை வயல் வெளிகளுக்கு நேரில் சென்று மாவட்ட ஆட்சியா் தி. சாருஸ்ரீ செவ்வாய்க்கிழமை ஆய்வு மேற்கொண்டாா். மேலும், விவசாயிகளுக்கு வேளாண் இடுபொருள்கள் வழங்கினாா்.

வேளாண்மை பொறியியல் துறை சாா்பில் மழவராய நல்லூரில் அமைக்கப்பட்டுள்ள பண்ணைக் குட்டை, சுந்தரக்கோட்டையில் சூரிய மின்சக்தி பம்பு செட், விதைப் பண்ணை வயல் திட்டத்தின் கீழ் நெடுவாக்கோட்டையில் 5 ஏக்கரில் பயிரிடப்பட்டுள்ள நெற்பயிா், தோட்டக்கலை மற்றும் மலைப்பயிா்கள் துறையின் சாா்பில் தமிழ்நாடு பாசன வேளாண்மை நவீனமயமாக்கல் திட்டத்தின் கீழ் முக்குளம் சாத்தனூரில் ரூ.57,927 மானியத்தில் அமைக்கப்பட்டுள்ள நுண்ணீா் பாசனம், மாநில தோட்டக் கலை வளா்ச்சி திட்டத்தில் ரூ.10,000 மானியத்தில் கத்தரி சாகுபடி ஆகியவற்றையும் பாா்வையிட்டாா்.

தொடா்ந்து, செருமங்கலத்தில் வேளாண்மை மற்றும் உழவா் நலத் துறையின் சாா்பில் நெல் குறுவை திட்டத்தில் 20 சென்ட் பரப்பில் (திருப்பதி சாரம் 5 ரகம்) இயந்திர நடவு பாய் நாற்றங்கால் அமைக்கப்பட்டு வருவதையும், எடக்கீழையூரில் உளுந்து விதைப் பண்ணை வயல் திட்டத்தில் 1 ஏக்கரில் (வம்பன் 10) பயிரிடப்பட்டுள்ளதையும், உளுந்து பயிா்களுக்கு டிரோன் மூலம் பூச்சிக்கொல்லி மருந்து தெளிப்பதையும், தோட்டக்கலை மற்றும் மலைப் பயிா்கள் துறையின் சாா்பில் ரூ.10,000 மானியத்தில் புடலை ரகம் பயிரிடப்பட்டுள்ளதையும், நடமாடும் காய்கறிகள் விற்பனை வண்டி செயல்படுவதையும் ஆட்சியா் ஆய்வு செய்தாா்.

முன்னதாக, விவசாயிகளுக்கு வேளாண்மை மற்றும் உழவா் நலத் துறை சாா்பில் பேட்டரி தெளிப்பான், தாா்ப்பாய், பண்ணைக் கருவிகள் உள்ளிட்ட வேளாண் இடுபொருள்களும், ஒருவருக்கு நடவு இயந்திரத்தையும் ஆட்சியா் வழங்கினாா்.

ஆய்வின்போது, வேளாண்மை பொறியியல் துறை செயற்பொறியாளா் ரேணுகாந்தன், தோட்டக்கலைத் துறை துணை இயக்குநா் வெங்கட்ராமன், வேளாண்மை துணை இயக்குநா் (மாநிலத் திட்டம்) லெட்சுமிகாந்தன், மாவட்ட ஆட்சியரின் நோ்முக உதவியாளா் (வேளாண்மை) ஏழுமலை, மன்னாா்குடி வட்டாட்சியா் என். காா்த்தி, வேளாண்மை உதவி இயக்குநா்கள் இளம்பூரணாா் (மன்னாா்குடி), விஜயகுமாா்(நீடாமங்கலம்) உள்ளிட்டோா் உடனிருந்தனா்.