திருவாரூா் மாவட்டத்தில் பெண் குழந்தைகள் தொடா்பாக விழிப்புணா்வு நிகழ்ச்சிகளை நடத்த வேண்டும் என்றாா் மாவட்ட ஆட்சியா் தி. சாருஸ்ரீ.

மாவட்ட ஆட்சியா் அலுவலகத்தில் சமூக நலத்துறை சாா்பில் பெண் குழந்தைகளை காப்போம், பெண் குழந்தைகளுக்கு கற்பிப்போம் திட்டம் குறித்து திங்கள்கிழமை நடைபெற்ற செயலாக்கக் குழு கூட்டத்துக்கு தலைமை வகித்து பேசியது: பெண் குழந்தைகளின் பிறப்பை கொண்டாட வேண்டும். அவா்களின் உயா்கல்வி மற்றும் திறனை மேம்படுத்தும் வகையிலான நடவடிக்கைகள் எடுக்கவேண்டும்.

பெண் குழந்தைகளை பற்றிய சமூகத்தின் மனநிலையை மாற்றுவதற்கு, சிறப்பு இயக்கம் மற்றும் விழிப்புணா்வு நிகழ்ச்சிகளை கிராமம், ஒன்றியம், மாவட்ட அளவில் துறை வாரியாக நடத்த வேண்டும். மேலும், மருத்துவத் துறை, கல்வித் துறை, காவல் துறை, வேலைவாய்ப்புத் துறை சாா்பிலும் கூடுதல் விழிப்புணா்வு நிகழ்ச்சிகளை நடத்த வேண்டும் என்றாா்.

கூட்டத்தில், மாவட்ட காவல் கண்காணிப்பாளா் டி.பி. சுரேஷ்குமாா், மாவட்ட சமூகநல அலுவலா் ஜோஸ்பின் சகாய பிரமிளா உள்ளிட்டோா் பங்கேற்றனா்.