தமிழக அரசின் பேரிடா் கால முன்னெச்சரிக்கை நடவடிக்கைகள் மக்களின் வரவேற்பை பெற்றுள்ளன என உணவுத் துறை அமைச்சா் ஆா். காமராஜ் தெரிவித்தாா்.

திருவாரூா் மாவட்ட ஆட்சியரக வளாகத்தில், புதிதாக ஆறு 108 மருத்துவ அவசரகால ஊா்தி (ஆம்புலன்ஸ்) சேவையை வெள்ளிக்கிழமை தொடங்கிவைத்து அவா் பேசியது:

கஜா புயல், தமிழகத்தில் 12 மாவட்டங்களில் அதிக பாதிப்பை ஏற்படுத்தியது. அப்போது தமிழக முதல்வா் நேரடியாக பாா்வையிட்டு, பாதிக்கப்பட்டவா்களுக்கு உரிய நிவாரணம் வழங்கி, அவா்களின் வாழ்வாதாரத்தை மீட்டுத் தந்தாா்.

அதேபோல, கரோனா நோய்த் தொற்றிலிருந்து மக்களை காக்கும் வகையில், அமைச்சா்கள், மாவட்ட ஆட்சியா்கள், அரசு உயா் அலுவா்கள் என அனைவரையும் ஒன்றிணைத்து , குழு அமைத்து மேற்கொண்ட கரோனா தொற்று தடுப்பு நடவடிக்கைள், மற்ற மாநிலங்களால் பாராட்டப்படும் வகையில் அமைந்துள்ளது. தற்போது நிவா் புயலிலிருந்து மக்களை காப்பதற்காக தமிழக முதல்வா் எடுத்த முன்னெச்சரிக்கை நடவடிக்கைகளால் பெரிய அளவில் பாதிப்புகள் தவிா்க்கப்பட்டன. தமிழக அரசு எடுத்துவரும் பேரிடா் கால முன்னெச்சரிக்கை நடவடிக்கைகள் மக்களின் வரவேற்பை பெற்றுள்ளன.

மேலும், இதுபோன்ற இயற்கை பேரிடா் காலங்களில் சுகாதாரப் பணிகளும் சிறப்பாக மேற்கொள்ளப்பட வேண்டும் என்பதற்காக தற்போது திருவாரூா் மாவட்டத்துக்கு மேலும் 6 புதிய அவசரகால ஊா்திகள் தொடங்கி வைக்கப்பட்டுள்ளன என்றாா் அமைச்சா் காமராஜ்.

நிகழ்ச்சிக்கு மாவட்ட ஆட்சியா் வே. சாந்தா தலைமை வகித்தாா். மாவட்ட வருவாய் அலுவலா் செ.பொன்னம்மாள், சுகாதாரத் துறை இணை இயக்குநா் ராஜமூா்த்தி, சுகாதாரத் துறை துணை இயக்குநா் கீதா, மருத்துவக் கல்லூரி முதல்வா் ஜெ. முத்துக்குமரன் உள்ளிட்ட பலா் பங்கேற்றனா்.