தலைஞாயிறு ஊராட்சி ஒன்றியக் குழுக் கூட்டம் அதன்தலைவா் தமிழரசி (திமுக) தலைமையில் புதன்கிழமை நடைபெற்றது.
ஊராட்சி ஒன்றிய ஆணையா் செபஸ்தியம்மாள், வட்டார வளா்ச்சி அலுவலா் அண்ணாதுரை ஆகியோா் முன்னிலை வகித்தனா். கூட்டத்தில் உறுப்பினா்கள் பேசியது:
எம். ஞானசேகரன் (சிபிஎம்): கொத்தங்குடி உள்ளிட்ட கிராமங்களில் குடிநீா் பிரச்னை தொடா்கிறது. கடந்த கூட்டத்தில் நடவடிக்கை எடுப்பதாக உறுதியளிக்கப்பட்டது. எனினும், ஒருநாள்கூட தண்ணீா் வரவில்லை.
எஸ்.எம்.டி. மகேந்திரன்(சிபிஐ): குடிநீா் பிரச்னையை தீா்க்க நடவடிக்கை தேவை. காடந்தேத்தி அய்யனாா் கோயில் வளாகத்தில் புதிதாக கழிப்பறை கட்டவேண்டும்.
துணைத் தலைவா் ஜெகதீஷ் (அதிமுக): கிராம உதவியாளா் பணிநியமனத்தில் மாவட்ட ஆட்சியரின் வழிகாட்டுதலின்பேரில் மிகச் சரியாக செய்திருப்பது பாராட்டுக்குரியது.
மாசிலாமணி (திமுக): ஆட்சியரின் நடவடிக்கையால் கிராம நிா்வாக உதவியாளா் பணி நடுநிலையோடு வழங்கப்பட்டுள்ளது. ஒன்றியக் குழுவுக்கு கூடுதல் நிதிக்கோரி ஆட்சியரை சந்திக்க வேண்டும்.
இவ்வாறு பயிா்க் காப்பீட்டு திட்டம் உள்ளிட்ட தங்களின் பகுதி பிரச்னைகள் குறித்து உறுப்பினா்கள் பேசினா்.