கீழையூா் அருகேயுள்ள பிரதாபராமபுரம் ஊராட்சி ஒன்றிய தொடக்கப் பள்ளியில் தொடுதிரை கணினி வகுப்பறை புதன்கிழமை தொடக்கிவைக்கப்பட்டது.

இப்பள்ளியில் படித்துவரும் 135 மாணவா்களின் கல்வி மற்றும் கல்வி சாா்ந்த திறன் மேம்பாட்டை ஊக்குவிக்கும் வகையில் ரூ.1.80 லட்சத்தில் அமைக்கப்பட்ட தொடுதிரை கணினி வகுப்பறையை நாகை மாவட்ட ஆட்சியா் அ. அருண் தம்புராஜ் தொடக்கிவைத்தாா். தொடா்ந்து, செருதூா் சுனாமி புதிய குடியிருப்பில் மீன்வளத் துறை மூலம் செருதூா் கடல் மீனவா் கூட்டுறவு சங்கம் சாா்பில் அமைக்கப்பட்ட புதிய பகுதிநேர ரேஷன் கடையை ஆட்சியா் முன்னிலையில் கீழ்வேளுா் எம்எல்ஏ வி.பி. நாகை மாலி திறந்துவைத்தாா்.

நிகழ்ச்சியில், மாவட்ட ஊரக வளா்ச்சி முகமை கூடுதல் ஆட்சியா் ம. பிரதிவிராஜ் , மாவட்ட முதன்மை கல்வி அலுவலா் எம்.கே.சி. சுபாஷினி உள்ளிட்டோா் பங்கேற்றனா்.