கொள்முதல் செய்யப்படும் நெல் மூட்டைகளை நேரடியாக அரைவை ஆலைகளுக்கே அனுப்புவதற்கான நடவடிக்கைகள் மேற்கொள்ளப்பட்டு வருகின்றன என்று தமிழக உணவுத் துறை அமைச்சா்அர. சக்கரபாணி தெரிவித்தாா்.

நாகை மாவட்டம், தலைஞாயிறு ஊராட்சி ஒன்றியம், கோவில்பத்து ஊராட்சியில் உள்ள தமிழ்நாடு நுகா்பொருள் வாணிபக் கழக உணவு தானிய சேமிப்புக் கிடங்கை அமைச்சா் அர. சக்கரபாணி ஞாயிற்றுக்கிழமை பாா்வையிட்டாா்.

பின்னா் அவா் அளித்த பேட்டி:

திறந்தவெளியில் வைக்கப்பட்டுள்ள நெல் மூட்டைகளை உடனடியாக பிற மாவட்டங்களுக்கு ரயில் மூலம் அனுப்புவதற்கு ஏற்பாடு செய்யப்பட்டுள்ளது. நாகை மாவட்டத்தை பொருத்தவரை, குறுவையில் 40 ஆயிரம் மெட்ரிக் டன்னும், சம்பாவில் 1.30 லட்சம் மெட்ரிக் டன்னும் கொள்முதல் செய்யப்பட்டு, தற்போது 1.20 லட்சம் மெட்ரிக் டன் நெல் மூட்டைகள் இருப்பில் உள்ளன.

திறந்தவெளியில் வைக்கப்பட்டுள்ள நெல் மூட்டைகளை பாதுகாக்க 2 வழிமுறைகள் கையாளப்படவுள்ளன. தேவைப்படும் இடங்களில் சிமென்ட் தரைதளம், மேற்கூரை மற்றும் கொட்டகை அமைக்க நடவடிக்கை எடுக்கப்படும். அல்லது கொள்முதல் செய்யப்படும் நெல் மூட்டைகளை நேரடியாக தனியாா் அரிசி அரைவை ஆலைகளுக்கு அனுப்பிவைக்கப்படும்.

இந்த அரிசி மூட்டைகளை சேமித்து வைத்து அரைத்து தருவதாக தனியாா் ஆலை உரிமையாளா்கள் தெரிவித்துள்ளனா். இதற்கான முன்மதிப்பீடு கோரப்பட்டுள்ளது. தமிழக முதல்வரின் ஒப்புதலைப் பெற்று இத்திட்டம் செயல்படுத்தப்படும்.

போக்குவரத்து செலவு, ஏற்றுக் கூலி, இறக்கு கூலி, லாரி வாடகை போன்ற செலவினங்களை குறைப்பதற்காக இந்த நடவடிக்கை மேற்கொள்ளப்படவுள்ளது என்றாா் அவா்.

மாவட்ட ஆட்சியா் அ. அருண் தம்புராஜ், தமிழ்நாடு மீன்வளா்ச்சிக் கழகத் தலைவா் என். கௌதமன், தமிழ்நாடு நுகா்பொருள் வாணிபக்கழக முதுநிலை மண்டல மேலாளா் சி. ராஜ்குமாா், செயற்பொறியாளா் முத்துவேல், உதவி செயற்பொறியாளா் பிரகதீஸ்வரன், மேலாளா் (தரக்கட்டுபாடு) தியாகராஜன், செய்தி மக்கள் தொடா்பு அலுவலா் மு. தனபால் மற்றும் அரசு அலுவலா்கள் உடனிருந்தனா்.