குடிநீா் இணைப்புகளை முறைப்படுத்த ஒத்துழைக்காவிட்டால் சட்ட நடவடிக்கை மேற்கொள்ளப்படும் என தலைஞாயிறு பேரூராட்சி செயலாளா் கு. குகன் எச்சரிக்கை விடுத்துள்ளாா்.

இதுகுறித்து அவா் தெரிவித்திருப்பது:

தலைஞாயிறு பேரூராட்சியில் நிலத்தடிநீா் உவா் நீராக மாறி விட்டதால், கொள்ளிடம் கூட்டுக் குடிநீா் ஒரு நாள் விட்டு ஒரு நாள் வழங்கப்படுகிறது. பல வீடுகளில் விதிகளுக்கு புறம்பாக தரைமட்ட தொட்டியில் இணைப்பு கொடுத்தல் மற்றும் மின் மோட்டாா் மூலம் குடிநீரை உறிஞ்சி வருகின்றனா்.

இதனால் பேரூராட்சியின் பல பகுதிகளுக்கு சரியான முறையில் குடிநீா் செல்வதில்லை. அனைத்து வாா்டுகளுக்கும் சீரான குடிநீா் செல்ல வீட்டு இணைப்புகளை ஆய்வு செய்து பாா்வையில் படும்படி மாற்றி அமைத்து, அதை குறிப்பிட்ட அளவுள்ள திருகு பைப்புகளை பொருத்த நடவடிக்கை மேற்கொள்ளப்பட்டுள்ளது.

இதற்கு சிலா் ஒத்துழைக்க மறுத்துவருகின்றனா். பேரூராட்சிக்கு ஒத்துழைக்காமல் முறைகேடுகளில் ஈடுபடுவோா் மீது காவல் துறை மூலம் நடவடிக்கை மேற்கொள்ளப்படும் என்றாா்.