நாகை மாவட்டத்தில் செயல்படுத்தப்படும் நம்ம ஊரு சூப்பரு சிறப்பு இயக்கம் வெற்றி பெற அனைவரும் ஒத்துழைக்க வேண்டும் என ஆட்சியா் அ. அருண் தம்புராஜ் வேண்டுகோள் விடுத்துள்ளாா்.

இதுகுறித்து அவா் வெளியிட்ட செய்திக் குறிப்பு:

தமிழக அரசு உத்தரவுபடி, சுகாதாரப் பாதுகாப்பு மற்றும் சுற்றுப்புறத் தூய்மை, ஆரோக்கியம் மற்றும் உற்பத்தித் திறன் மேம்பாடு, பாதுகாப்பு ஆகியன குறித்த ஒருங்கிணைந்த நடவடிக்கைகளுக்காக நம்ம ஊரு சூப்பரு என்ற சிறப்பு இயக்கம் அறிவிக்கப்பட்டுள்ளது. மாவட்டத்தில் உள்ள அனைத்து கிராம ஊராட்சிகளிலும் ஆகஸ்ட் 20-ஆம் தேதி தொடங்கி அக்டோபா் 2-ஆம் தேதி வரை இந்த இயக்கம் நடைபெறும். இந்நாள்களில் பொது இடங்களில் தூய்மைப் பணிகள் மேற்கொள்ளப்படும்.

ஆகஸ்ட் 27-ஆம் தேதி முதல் செப்டம்பா் 2-ஆம் தேதி வரை பள்ளி மற்றும் கல்லூரிகளில் நீா் சுகாதாரம் மற்றும் கழிவுப் பொருள்களைக் கையாளுதல் குறித்த விழிப்புணா்வு பணிகள் நடைபெறும்.

செப்டம்பா் 3 முதல் 16-ஆம் தேதி வரை மகளிா் குழு உறுப்பினா்கள் மூலம் வீடுதோறும் நீா் சுகாதாரம் மற்றும் கழிவுப் பொருள்களைக் கையாளுதல் குறித்த விழிப்புணா்வு பணிகள் மேற்கொள்ளப்படும். செப்டம்பா் 17 முதல் 23-ஆம் தேதி வரை ஒரு முறை மட்டும் பயன்படுத்தும் நெகிழிப் பொருள்களுக்கு பதிலாக மாற்றுப் பொருள்களைப் பயன்படுத்துதல் மற்றும் மீண்டும் மஞ்சப்பை இயக்கம் குறித்து விழிப்புணா்வு ஏற்படுத்தும் பணிகள் நடைபெறும். செப்டம்பா் 24 முதல் அக்டோபா் 1-ஆம்தேதி வரை தூய்மை மற்றும் பசுமை கிராமங்களை உருவாக்கும் பணிகள் மேற்கொள்ளப்படும்.

நம்ம ஊரு சூப்பரு சிறப்பு இயக்கத்தின் பணிகளை மாவட்ட அளவில் மாவட்ட ஊரக வளா்ச்சி முகமையின் திட்ட இயக்குநரும், வட்டார அளவில் உதவி இயக்குநா் நிலையிலான பொறுப்பு அலுவலா்களும் கண்காணிப்பா். இந்தச் சிறப்பு இயக்கம் முழுமையாக வெற்றி பெற அனைத்துத் துறை அலுவலா்கள், உள்ளாட்சி அமைப்புகளின் பிரதிநிதிகள், தன்னாா்வலா்கள் முழுமையாக ஒத்துழைப்பு அளிக்குமாறு ஆட்சியா் கேட்டுக்கொண்டுள்ளாா்.