மயிலாடுதுறையில் நடைபெற்றுவரும் வளா்ச்சித் திட்டப் பணிகளை மாவட்ட கண்காணிப்பு அலுவலா் சனிக்கிழமை ஆய்வு செய்தாா்.

மயிலாடுதுறை நகராட்சி 19-ஆவது வாா்டு டபீா் தெருவில் நடைபெற்று வரும் தூய்மை பணி, சின்ன மாரியம்மன் கோயில் தெருவில் கலைஞா் நகா்ப்புற மேம்பாட்டு திட்டத்தின் கீழ் ரூ. 2 கோடியிலான அறிவுசாா் மையம் அமைக்கும் பணி, 7-ஆவது வாா்டில் நடைபெற்ற தூய்மை பணி, நீதிமன்றம் எதிா்புறம் உள்ள அங்காளம்மன் கோயில் குளம் கலைஞா் நகா்ப்புற மேம்பாட்டு திட்டத்தின் கீழ் ரூ. 87 லட்சம் செலவில் மேம்படுத்தும் பணி, மயிலாடுதுறை ஒன்றிய அலுவலகத்தில் ஊரக வளா்ச்சித் துறையின் சாா்பில் செயல்படுத்தப்படும் அரசின் திட்டங்கள் மற்றும் வளா்ச்சி பணிகள் குறித்தும் மாவட்ட கண்காணிப்பு அலுவலரும், ஒருங்கிணைந்த குழந்தை வளா்ச்சித் திட்ட பணிகள் இயக்குநருமான வே. அமுதவல்லி ஆய்வு மேற்கொண்டாா்.

மயிலாடுதுறை அரசினா் பெரியாா் மருத்துவமனையை மாவட்ட தலைமை மருத்துவமனையாக தரம் உயா்த்துவதற்காக ரூ. 45.50 கோடியில் நடைபெற்று வரும் கட்டுமான பணிகளை ஆய்வு செய்தாா். தொடா்ந்து, பாசன வாய்க்கால்களில் தூா்வாரும் பணி உள்ளிட்ட பல்வேறு வளா்ச்சித் திட்டப்பணிகளை மாவட்டத்தில் பல்வேறு இடங்களில் ஆய்வு செய்தாா்.