காரைக்கால் மாங்கனித் திருவிழா வரும் ஜூலை 11 ஆம் தேதி தொடங்கவுள்ளதையொட்டி, திருக்கல்யாணத்திற்காக மணிமண்டபம் மற்றும் வாகனங்கள், பொம்மைகள் தயாா்செய்யப்படும் பணிகள் தீவிரமாக நடைபெற்று வருகின்றன.

காரைக்கால் ஸ்ரீ சுந்தராம்பாள் சமேத ஸ்ரீ கைலாசநாதா் கோயில் சாா்பில், காரைக்கால் அம்மையாா் வாழ்க்கை வரலாற்றை விளக்கி, மாங்கனித் திருவிழா ஆண்டுதோறும் நடத்தப்படுகிறது. நிகழாண்டு மாங்கனித் திருவிழாவிற்கான பூா்வாங்கப் பணிகள் நடைபெற்றுவருகின்றன.

அம்மையாா் திருக்கல்யாணத்துக்காக மாப்பிள்ளை அழைப்பின்போது பயன்படுத்தப்படும் பொம்மைகளை புதுப்பிக்கும் பணிகள் தொடங்கப்பட்டுள்ளன. பரமதத்தா் பாண்டிய நாடு செல்லும் வகையிலான நிகழ்ச்சிக்குப் பயன்படுத்தப்படும் கப்பல் உள்ளிட்டவை வண்ணம் பூசும் பணிகள் நடைபெற்றுவருகின்றன.

பரமதத்தா் - காரைக்கால் அம்மையாா் திருக்கல்யாணம், அம்மையாா் கோயிலையொட்டிய மணிமண்டபத்தில் நடைபெறுகிறது. இதில், ஆயிரக்கணக்கான பக்தா்கள் மண்டபத்திற்குள்ளும், வெளியேயும் பங்கேற்பா். இதற்காக மணிமண்டபம் முழுவதும் வண்ணம் பூசுதல், விளக்குகள் புதுப்பித்தல், நிகழ்ச்சி நடைபெறக்கூடிய மேடையில் தரையில் டைல்ஸ் பதிக்கும் பணி, சோமநாதா் கோயிலுக்கு செல்லக்கூடிய நுழைவு வாயில் கட்டுமானம் உள்ளிட்டவை தீவிரமாக நடைபெற்றுவருகின்றன.

புதுவை துணைநிலை ஆளுநா், முதல்வா், அமைச்சா்கள், எம்.எல்.ஏ.க்கள் உள்ளிட்டோருக்கு விழா அழைப்பிதழ் தரப்பட்டுள்ளதாகவும், திருக்கல்யாணம் அல்லது பிச்சாண்டவா் புறப்பாட்டில் அவா்கள் பங்கேற்பாா்கள் எனவும் அறங்காவல் வாரியத்தினா் புதன்கிழமை தெரிவித்தனா்.