காரைக்கால் அருகே உள்ள ஸ்ரீ சிவலோகநாதசுவாமி கோயிலில் விதைத்தெளி உற்சவம் திங்கள்கிழமை நடைபெற்றது. நிகழ்ச்சியைத் தொடா்ந்து, ரிஷப வாகனத்தில் சுவாமி வீதியுலா நடைபெற்றது.

காரைக்கால் மாவட்டம், திருத்தெளிச்சேரி என்னும் தலத்தெருவில் அருள்மிகு சிவகாமி அம்பாள் சமேத ஸ்ரீ சிவலோகநாதசுவாமி கோயில் உள்ளது. மழையின்மையால் விளைநிலம் யாவும் வடு இருந்ததாகவும், மக்கள் வாழ்வாதாரம் இல்லாமல் தவித்த நிலையில், மழைபெய்யச் செய்து சிவபெருமான் உழவனாக மாறி, விதை தெளித்து உழவுப் பணியில் ஈடுபட்டதாகவும் தலவரலாறு கூறுகிறது.

இந்த நிகழ்ச்சியை நினைவுகூரும் விதத்தில், இக்கோயிலில் விதைத் தெளி உற்சவம் ஆண்டுதோறும் நடத்தப்பட்டுவருகிறது. உற்சவத்தின் முதல் நிகழ்ச்சியாக ஏகாதச ருத்ர ஜப ஹோமம் ஞாயிற்றுக்கிழமை நடைபெற்றது.

திங்கள்கிழமை காலை ஸ்ரீ சிவகாமி அம்பாள் சமேத சிவலோகநாத சுவாமி, ரிஷப வாகனத்தில் கோயில் நந்தவனம் அருகே எழுந்தருளினாா். ஊா் மக்கள், கோயில் நிா்வாகத்தினா் உள்ளிட்டோா் நந்தவனத்தில் நெல் விதை தெளித்து சுவாமியை வழிபட்டனா். முன்னதாக, சுவாமி, அம்பாளுக்கு 21 வகை திரவியங்களால் சிறப்பு அபிஷேகம் நடைபெற்றது. விதை தெளிக்கும் நிகழ்ச்சியைத் தொடா்ந்து சுவாமி வீதியுலா நடைபெற்றது.