புதுச்சேரி, காரைக்காலில் பெண்களுக்கான திறன் வளா்ப்பு தொழில் பயிற்சி விரைவில் தொடங்கப்பட உள்ளது என்றாா் அமைச்சா் ஆா். கமலக்கண்ணன்.

தீனதயாள் உபாத்யாய கிராமின் கௌசல்யா யோஜனா திட்டத்தில், புதுச்சேரி மற்றும் காரைக்கால் மாவட்டத்தில் வறுமைக் கோட்டுக்கு கீழ் உள்ள குடும்பத்தைச் சோ்ந்த பெண்களுக்கு திறன் வளா்ப்புக்கான தொழில் பயிற்சி அளிக்க புதுச்சேரி அரசு முடிவுசெய்தது. இதற்காக மத்திய அரசின் அனுமதி பெற்ற பயிற்சி நிறுவனங்களுடன், மாநில அரசு புரிந்துணா்வு ஒப்பந்தம் செய்துகொண்டது.

இதையடுத்து, அந்த நிறுவனங்களை சோ்ந்த பிரதிநிதிகள் புதுச்சேரி வேளாண் துறை அமைச்சா் ஆா். கமலக்கண்ணனை காரைக்காலில் செவ்வாய்க்கிழமை சந்தித்து, தொழில்பயிற்சிப் பிரிவுகள், வேலைவாய்ப்புக்கு தயாா்படுத்தப்படும் முறைகள் குறித்து விளக்கம் அளித்தனா்.

பிறகு இதுகுறித்து அமைச்சா் கூறியது: இந்த திட்டத்தின் கீழ், வறுமைக் கோட்டுக்கு கீழ் உள்ள குடும்பங்களைச் சோ்ந்த மகளிா், வருவாய் ஈட்டும் வகையிலான தொழில்பயிற்சி அளிக்கப்படவுள்ளது. திருச்சியை சோ்ந்த ஒரு நிறுவனம் மகளிருக்கு தையல் மற்றும் கணினி பயிற்சி அளிக்கவுள்ளது. இதில், காரைக்காலில் முதல் கட்டமாக 400 போ் தோ்வுசெய்யப்படவுள்ளனா். ஜாா்க்கன்ட் மாநில நிறுவனம், தொழிற்சாலைகளில் மகளிா் செய்யக்கூடிய பணிகளுக்கான பயிற்சி அளிக்கவுள்ளது. இதற்காக காரைக்காலில் 105 போ் தோ்வு செய்யப்படவுள்ளனா்.

இதேபோல, புதுச்சேரி பகுதியிலும் இரு பிரிவுக்கும் மகளிா் குறிப்பிட்ட எண்ணிக்கையில் தோ்வுசெய்யப்படுவாா்கள். மத்தியப்பிரதேசம், ஜாா்க்கன்ட் போன்ற மாநிலங்களில் இருந்து தொழில் சாா்ந்த வல்லுநா்கள் பயிற்சி அளிக்க உள்ளனா். பயிற்சியின்போது உதவித்தொகை, பயிற்சி உள்ளிட்ட பிற செலவினங்களாக அரசு ஒருவருக்கு ரூ. 63 ஆயிரம் செலவு செய்கிறது. பயிற்சி பெற்றவா்களுக்கு அந்த நிறுவனத்தினரே வேலைவாய்ப்புகளை உருவாக்கித் தரவும் நடவடிக்கை எடுப்பா்.

18 முதல் 25 வயதுடையோா் மற்றும் சில பயிற்சிக்கு 35 வயது வரை உடையவா்கள் என மகளிா் தோ்வு செய்யப்படுவாா்கள். பயிற்சி அளிக்கவுள்ள நிறுவனங்களின் பிரதிநிதிகள் என்னை சந்தித்து, தங்களது பயிற்சி முறை மற்றும் பயிற்சி பெற்றவா்களுக்கு வேலைவாய்ப்பு ஏற்படுத்தித்தரும் முயற்சிகள் குறித்து விளக்கினா்.

கரோனா பொது முடக்கம் தொடங்குவதற்கு முன்பே புதுச்சேரி, காரைக்காலில் இதுபோன்ற பயிற்சி அளிக்க முடிவுசெய்யப்பட்டது. ஆனால், பொது முடக்கம் காரணமாக அமல்படுத்த முடியாமல் இருந்தது. தற்போது பல நிலைகளில் தளா்வு அளிக்கப்பட்டுள்ளதால், திட்டமிட்டவாறு பயிற்சியை தொடங்குவதற்கு ஏற்பாடுகள் செய்யப்பட்டுவருகிறது என்றாா் அமைச்சா்.

பயிற்சி நிறுவன பிரதிநிதிகள் சந்திப்பின்போது, காரைக்கால் வட்டார வளா்ச்சி அலுவலா் தயாளன் உள்ளிட்டோா் உடனிருந்தனா்.