ராஜபாளையம் அருகே செட்டியாா்பட்டி பேரூராட்சியில் முறைகேடு நடப்பதாக கவுன்சில் கூட்டத்தில் திமுக உறுப்பினா்கள் வெள்ளிக்கிழமை புகாா் தெரிவித்தனா்.

ராஜபாளையம் அருகே செட்டியாா்பட்டி பேரூராட்சியில் திமுக- 11, அதிமுக- 3, சுயேச்சை- 1 என மொத்தம் 15 உறுப்பினா்கள் உள்ளனா். இந்நிலையில் நடைபெற்ற பேரூராட்சி கூட்டத்தில் 12 உறுப்பினா்கள் கலந்து கொண்டனா். இக்கூட்டம் செயல் அலுவலா் சந்திரகலா முன்னிலையில் நடைபெற்றது. இதில் துணைத் தலைவா் விநாயகமூா்த்தி உள்ளிட்ட உறுப்பினா்கள் கூறியதாவது: பேரூராட்சியில் பணிகள் மேற்கொள்ளும் போது உறுப்பினா்களிடம் கலந்து ஆலோசிப்பதில்லை. முறைகேடாக கணக்கு எழுதி ரூ. பல லட்சம் வரை ஊழல் நடந்துள்ளது. கூட்டத்தில் சமா்ப்பிக்கப்பட்ட 170 கணக்குகளில் 90 கணக்குகள் தவறாக உள்ளது. சமீபத்தில் விடப்பட்ட ஒப்பந்தத்திலும் முறைகேடு நடந்துள்ளதால் அதை ரத்து செய்து விட்டு, மறுஒப்பந்தம் அறிவிக்க வேண்டும் என்றனா்.

கூட்டத்தில், தீா்மானம் நிறைவேற்றப்படாத நிலையில், பேரூராட்சித் தலைவா் ஜெயமுருகன் (திமுக) கூட்ட அரங்கில் இருந்து வெளியேறினாா். இதுகுறித்து உறுப்பினா்கள், மாவட்ட ஆட்சியரை தொலைபேசியில் தொடா்பு கொண்டு புகாா் தெரிவித்தனா்.