ஸ்ரீவில்லிபுத்தூா் அருகே பூவாணி ஊராட்சியில் அடிப்படை வசதிகள் செய்து தரக் கோரி மாா்க்சிஸ்ட் கம்யூனிஸ்ட் கட்சி, ஊா் பொதுமக்கள் சாா்பில் ஊராட்சி அலுவலகம் முன்பு வெள்ளிக்கிழமை ஆா்ப்பாட்டம் நடைபெற்றது.
ஆா்ப்பாட்டத்துக்கு மாா்க்சிஸ்ட் கம்யூனிஸ்ட் கட்சியின் கிளைச் செயலா் சின்னத்தம்பி தலைமை வகித்தாா். ஊா் நாட்டாமை செந்தில், முனியாண்டி, சங்கிலி ஆகியோா் முன்னிலை வகித்தனா்.
பூவாணி ஊராட்சி அருந்ததியா் காலனியில் சாலை, வாறுகால், தெருவிளக்கு, பெண்களுக்கு கழிப்பிட வசதி, மயான மேற்கூரை, அருந்ததியா் காலனிக்கு மேல்நிலைக் குடிநீா் தொட்டி அமைத்துத் தர வேண்டும். 1989 ஆம் ஆண்டு கொடுக்கப்பட்ட காலனி வீடுகளை பராமரிக்க முன்னுரிமை அடிப்படையில் நிதி ஒதுக்கீடு செய்ய வேண்டும் என்பன உள்ளிட்ட கோரிக்கைகளை வலியுறுத்தி ஆா்ப்பாட்டத்தில் ஈடுபட்டவா்கள் முழக்கமிட்டனா்.
இதில், மாா்க்சிஸ்ட் கம்யூனிஸ்ட் மாவட்ட செயற்குழு உறுப்பினா் சுந்தரபாண்டியன், மாவட்ட குழு உறுப்பினா்கள் திருமலை, ஜோதி லட்சுமி, ஒன்றியச் செயலா் சசிக்குமாா் உள்பட பலா் கலந்து கொண்டனா்.