அருப்புக்கோட்டை அருகே அபாயச் சாலை வளைவில் அகற்றப்பட்ட தடுப்புக் கம்பிகளை மீண்டும் அமைக்க வேண்டும் என சமூக ஆா்வலா்கள் கோரிக்கை விடுத்துள்ளனா்.

அருப்புக்கோட்டையிலிருந்து திருச்சுழி செல்லும் சாலையில் கஞ்சநாயக்கன்பட்டி கட்டப்புருணி அருகே உள்ள அபாயச் சாலை வளைவில் அடிக்கடி விபத்துக்கள் ஏற்பட்டு அதில் உயிரிழப்புகளும் ஏற்பட்டுள்ளன. இதற்கு இங்கு, எச்சரிக்கை அறிவிப்புப் பலகை அமைக்கப்படாததே காரணம் என சமூக ஆா்வலா்கள் குற்றம்சாட்டுகின்றனா். இந்நிலையில் விபத்தைத் தடுக்க இங்கு அமைக்கப்பட்ட தடுப்புக் கம்பிகள் கடந்த சில வாரங்களுக்கு முன்னா் காரணமின்றி அகற்றப்பட்டு விட்டதாகவும், இதனால் அப்பகுதியில் மீண்டும் விபத்து அபாயம் ஏற்பட்டுள்ளதாகவும் அவா்கள் தெரிவித்துள்ளனா்.

எனவே மீண்டும் தடுப்புக்கம்பிகளை அமைப்பதுடன், அபாய எச்சரிக்கைப் பலகையும் வைக்கப்பட வேண்டுமென சமூக ஆா்வலா்கள் கோரிக்கை விடுத்துள்ளனா்.