கிராமப்புற வளா்ச்சிக்கு முக்கியத்துவம் அளிக்கப்படும் என சிவகங்கை மாவட்ட ஆட்சியா் பி. மதுசூதன் ரெட்டி தெரிவித்துள்ளாா்.

கல்லல் அருகே பனங்குடி கிராமத்தில் அண்ணல் காந்தியடிகள் 154-ஆவது பிறந்த நாள் விழாவினை முன்னிட்டு ஞாயிற்றுக்கிழமை நடைபெற்ற கிராமசபைக் கூட்டத்தில் மாவட்ட ஆட்சியா் பி.மதுசூதன் ரெட்டி கலந்து கொண்டு பேசியதாவது:

கிராமப்புற மக்களின் கோரிக்கைகளை நேரடியாக அறிந்து கொள்வதுமட்டுமின்றி புதிய திட்டங்கள் பயனாளிகளுக்கு வழங்குவதற்கான பட்டியல் தோ்வு செய்வதற்கு இக்கிராமச் சபைக் கூட்டம் மிகவும் பயனுள்ளதாக உள்ளது.

கிராமப்புற வளா்ச்சியில் தான் ஒட்டுமொத்த நாட்டின் வளா்ச்சி உள்ளது. எனவே ஊரகப்பகுதிகளில் அடிப்படை வசதிகள், வேலைவாய்ப்பு ஆகியவற்றில் தன்னிறைவுபெற எண்ணற்ற திட்டங்கள் செயல்படுத்தப்பட்டு வருகின்றன. இனி வரும் காலங்களில் கிராமப்புற வளா்ச்சிக்கு முக்கியத்துவம் அளிக்கப்படும் என்றாா்.

அதைத்தொடா்ந்து, பி.நடராஜபுரம் ராமசாமி நினைவு அரசு உதவிபெறும் உயா்நிலைப்பள்ளியில் ஆட்சியா் மரக்கன்றுகளை நடவு செய்தாா். முன்னதாக, சிவகங்கை காந்தி வீதியில் உள்ள காதி கிராப்ட் விற்பனை நிலையத்தில் காந்தி ஜெயந்தி விழாவை முன்னிட்டு கதா் சிறப்பு தள்ளுபடி விற்பனையை தொடக்கி வைத்த ஆட்சியா், சிவகங்கை அரண்மனை வாசல் முன்பு உள்ள காந்தியின் சிலைக்கு மாலை அணிவித்து மரியாதை செலுத்தினாா்.

இந்நிகழ்ச்சியில், சிவகங்கை சட்டப்பேரவை தொகுதி உறுப்பினா் பி.ஆா்.செந்தில்நாதன், மாவட்ட ஊரக வளா்ச்சி முகமை திட்ட இயக்குநா் ஆ.ரா.சிவராமன், தேவகோட்டை வருவாய் கோட்டாட்சியா்(பொறுப்பு) சி.ரத்தினவேல், இணை இயக்குநா் வேளாண்மைத்துறை (பொறுப்பு) ஆா்.தனபாலன், துணை இயக்குநா் (தோட்டக்கலைத்துறை) கு.அழகுமலை உள்ளிட்ட அலுவலா்கள், கிராம பொதுமக்கள் ஏராளமானோா் கலந்து கொண்டனா்.