வேளாண் விளை பொருள்களுக்கு குறைந்த பட்ச ஆதார விலையை அரசு நிா்ணயம் செய்வது உள்ளிட்ட கோரிக்கைகளை வலியுறுத்தி விருதுநகரில் விவசாய சங்கத்தினா் ஞாயிற்றுக்கிழமை நடைப் பயணம் மேற்கொண்டனா்.

சிஐடியு, இந்திய விவசாயத் தொழிலாளா் சங்கம், தமிழ்நாடு விவசாயிகள் சங்கம் ஆகிய அமைப்புகள் சாா்பில் 3 இடங்களில் இந்த நடைப் பயணம் நடைபெற்றது.

விருதுநகா் எம்ஜிஆா் சிலை அருகே தொடங்கிய நடைப்பயணத்துக்கு சிஐடியு கன்வீனா் வி.சரவணன் தலைமை வகித்தாா். மாவட்ட உதவித் தலைவா் எம்.வெள்ளைத்துரை, மாவட்ட இணைச் செயலா் ஆா்.பாலசுப்பிரமணியன், சாலையோர வியாபாரிகள் சங்கத்தின் நிா்வாகி ராதாகிருஷ்ணன் ஆகியோா் கோரிக்கைகளை வலியுறுத்திப் பேசினா். பழைய பேருந்து நிலையம் அருகே மாா்க்சிஸ்ட் கம்யூ. நகரச் செயலாளா் எல்.முருகன் நிறைவுரையாற்றினாா்.

இதேபோல, மத்திய சேனை முதல் ஆமத்தூா் வரை நடைபெற்ற நடைப்பயணத்துக்கு உழைக்கும் பெண்கள் ஒருங்கிணைப்புக்குழு கன்வீனா் எம்.சாராள், விவசாயிகள் சங்க ஒன்றியச் செயலா் ரெங்கநாதன் ஆகியோா் தலைமை வகித்தனா். சிஐடியு மாவட்ட துணைத் தலைவா் ஜி.வேலுச்சாமி தொடங்கி வைத்தாா்.

முதலிபட்டி முதல் ஆா்.ஆா்.நகா் வரை நடைபெற்ற நடைப்பயணத்துக்கு விவசாய சங்கத்தின் ஒன்றியச் செயலா் சேதுநாராயண சாமி, சங்கையா ஆகியோா் தலைமை வகித்தனா். சிஐடியு மாவட்ட நிா்வாகி எம்.சி.பாண்டின் தொடங்கி வைத்தாா்.

இந்த நடைப்பயணத்தில் அனைத்து தொழிலாளா்களுக்கும் குறைந்தபட்ச மாத ஊதியமாக ரூ.26 ஆயிரம், ஓய்வூதியமாக ரூ.10ஆயிரம் வழங்க வேண்டும். மின்சார சட்டத் திருத்த மசோதா 2022 -ஐ திரும்பப் பெற வேண்டும். அனைவருக்கும் வேலை, பணிப் பாதுகாப்பை உறுதிப்படுத்த வேண்டும். அனைத்து வேளாண் விளை பொருள்களுக்கும் குறைந்தபட்ச ஆதார விலையை அரசு நிா்ணயம் செய்ய வேண்டும். வீடற்ற அனைவருக்கும் வீடுகள் வழங்க வேண்டும் என்பது உள்ளிட்ட 14 அம்சக் கோரிக்கைகள் இதில் வலியுறுத்தப்பட்டன.