மதுரையில் உணவகத்தில் பணிபுரிந்து வந்த தொழிலாளி இணைய வழி சூதாட்டத்தில் ரூ. 2 லட்சத்தை இழந்ததால், மனமுடைந்து திங்கள்கிழமை தூக்கிட்டுத் தற்கொலை செய்து கொண்டாா்.

சேலம் மாவட்டம், முள்ளாகாடு பகுதியைச் சோ்ந்த முத்துராமன் மகன் குணசீலன் (26). இவா் மதுரை அண்ணாநகரில் உள்ள உணவகத்தில் பணிபுரிந்து வந்தாா். மதுரை தாசில்தாா் நகா் 1-ஆவது தெருவில் உள்ள வீட்டில் தங்கியிருந்த குணசீலன் திங்கள்கிழமை காலை நீண்ட நேரமாகியும் வெளியே வரவில்லை. இதனால், சக பணியாளா்கள் அங்கு சென்று பாா்த்த போது, வீட்டில் குணசீலன் தூக்கிட்டுத் தற்கொலை செய்துகொண்டது தெரிய வந்தது.

அண்ணாநகா் போலீஸாா் சம்பவ இடத்துக்குச் சென்று குணசீலனின் உடலை மீட்டு, கூறாய்வுக்காக மதுரை அரசு ராஜாஜி மருத்துவமனைக்கு அனுப்பிவைத்தனா். மேலும், இந்தச் சம்பவம் தொடா்பாக வழக்குப் பதிவு செய்து விசாரணை நடத்தினா்.

விசாரணையில், குணசீலன் இணைய வழி சூதாட்டத்தில் ரூ. 2 லட்சத்தை இழந்து கடன் தொல்லையால் அவதிப்பட்டதும், இதனால் மனமுடைந்து தற்கொலை செய்துகொண்டதும் தெரிய வந்தது.

இதுதொடா்பாக போலீஸாா் கூறியதாவது:

சேலம் மாவட்டம், முள்ளாகாடு பகுதியைச் சோ்ந்த மகாலட்சுமி - முத்துராமன் தம்பதிக்கு 3 மகன்கள். பல ஆண்டுகளுக்கு முன்பு தாய் மகாலட்சுமி உயிரிழந்த நிலையில், தந்தை முத்துராமன் வேறொரு திருமணம் செய்து தனியாக வசித்து வந்தாா். இதனால் குணசீலன் (26), பசுபதி (25), கமல் (23) ஆகிய 3 பேரும் பாட்டி தமிழரசியின் பராமரிப்பில் வளா்ந்து வந்தனா்.

இந்த நிலையில், குணசீலன் கல்லூரியில் பட்டப் படிப்பு 3-ஆம் ஆண்டு படித்து வந்த நிலையில், அவருக்கு கைப்பேசியில் இணைய வழி சூதாட்டத்தில் ஆா்வம் ஏற்பட்டு விளையாடி வந்துள்ளாா். இதனால் அவா் கடன் வலையில் சிக்கினாா். இதைத்தொடா்ந்து, அவரது தம்பி பசுபதி, குணசீலனின் கடனை அடைத்துவிட்டு, மதுரை அண்ணா பேருந்து நிலையப் பகுதியில் உள்ள உணவகத்தில் பணியில் சோ்த்துவிட்டாா்.

இதனால் கல்லூரிப் படிப்பை முடிக்காமலேயே, கடந்த ஓராண்டாக குணசீலன் உணவகத்தில் பணிபுரிந்து வந்தாா். அப்போதும் அவா் இணைய வழி சூதாட்டத்தில் தொடா்ந்து ஈடுபட்டு பணத்தை இழந்தாா். மேலும், பலரிடம் கடன் வாங்கியும் சூதாட்டத்தில் ஈடுபட்டதால் ரூ. 2 லட்சம் வரை இழந்ததாகக் கூறப்படுகிறது.

இதுதொடா்பாக குணசீலன், சக பணியாளா்களிடம் பணத்தை இழந்து விட்டதாகத் தெரிவித்தாா். இதனால் ஏற்பட்ட மன உளைச்சலில் குணசீலன் தூக்கிட்டுத் தற்கொலை செய்துகொண்டாா் என்றனா்.