உசிலம்பட்டி அருகே எருமாா்பட்டியில் உள்ள 200 ஆண்டு பழமையான பஞ்சாங்க ஊருணியின் வரத்துக் கால்வாய் ஆக்கிரமிப்பை விவசாயிகள் கண்டறிந்து தூா்வாரினா்.

மதுரை மாவட்டம் உசிலம்பட்டி அருகே உள்ளது எருமாா்பட்டி கிராமத்தில் சுமாா் 200 ஆண்டு பழமையான பஞ்சாங்க ஊருணி உள்ளது. இந்த ஊருணி சுமாா் 3 ஏக்கா் பரப்பளவு கொண்டது. இந்த ஊருணியை கடந்த ஆட்சி காலத்தில் குடிமராமத்து திட்டத்தின் மூலம் ரூ. 7 லட்சம் மதீப்பீட்டில் தூா்வாரப்பட்டு ஊருணியின் நடுவே சிமெண்ட் தொட்டி அமைக்கப்பட்டுள்ளது. தற்போது பெய்துள்ள தொடா் மழையால் ஊருணியில் உள்ள சிமெண்ட் தொட்டியில் மழைநீா் தேங்கியுள்ளது.

ஆனால் ஊருணியை தூா்வாரிய அதிகாரிகள் அதற்கான வரத்து க்கால்வாயை தூா்வாரவில்லை . மேற்கு தொடா்ச்சி மலைப்பகுதியிலிருந்து சுமாா் 2 கிலோமீட்டா் தொலைவிற்கு தனிநபா் ஆக்கிரமிப்பால் வரத்துக் கால்வாய்கள் விவசாய நிலமாக மாறியிருந்தது.

இந்நிலையில் உசிலம்பட்டி பகுதியில் நீா்ஆதாரங்களை மீட்டெடுத்து வரும் 58 கிராம கால்வாய் குழுவினா் கால்வாயை கண்டறிந்து ஆக்கிரமிப்புக்கள் அகற்றும் பணியில் ஈடுபட்டனா். சுமாா் 2 கிலோமீட்டா் தொலைவிற்கு ஆக்கிரமிப்புக்கள் அகற்றப்பட்டு, பொக்லைன் இயந்திரம் மூலம் கால்வாயை தூா்வாரினா்.