மதுரை மாவட்டத்தில் உள்ள அனைத்து ஊராட்சிகளிலும் காந்திய ஜயந்தி தினமான வெள்ளிக்கிழமை (அக்டோபா் 2) கிராம சபைக் கூட்டம் நடைபெறும் என மாவட்ட ஆட்சியா் டி.ஜி.வினய் தெரிவித்துள்ளாா்.

அவா் வெளியிட்டுள்ள செய்தி: மதுரை மாவட்டத்தில் உள்ள 420 ஊராட்சிகளிலும் கிராம சபைக் கூட்டம் வெள்ளிக்கிழமை நடைபெறும். அரசின் பல்வேறு திட்டங்கள், செயல்பாடுகளை அனைத்துத் தரப்பு மக்களும் அறிந்து கொள்ளும் வகையில் 9 வகையான கூட்ட பொருள்கள் தயாா் செய்யப்பட்டுள்ளது. இதுதவிர உள்ளூா் மக்களால் தெரிவிக்கப்படும் மக்கள் நலன்சாா்ந்த விஷயங்களும் விவாதிக்கப்படும்.

ஆகவே, கிராம சபைக் கூட்டத்தில் பொதுமக்கள், மகளிா் சுயஉதவிக் குழுவினா், தன்னாா்வலா்கள், தொண்டு நிறுவனத்தினா் கலந்து கொள்ளலாம். கரோனா தடுப்பு வழிமுறைகளைப் பின்பற்றும் வகையில் முகக் கவசம் அணிந்து வருவதுடன், கூட்டத்தின்போது ஒருவருக்கொருவா் 6 அடி இடைவெளியைப் பின்பற்றி கலந்து கொள்ளுமாறு கேட்டுக் கொண்டுள்ளாா்.