காவிரி டெல்டா மாவட்டங்களில் குறுவைப் பாசனத்துக்காக மேட்டூா் அணையிலிருந்து தமிழக முதல்வா் மு.க.ஸ்டாலின் செவ்வாய்க்கிழமை காலை காவிரி நீரைத் திறந்து வைத்தாா்.
சேலம் மாவட்டத்திலுள்ள மேட்டூா் அணை மூலமாக திருச்சி, தஞ்சாவூா், திருவாரூா், நாகப்பட்டினம், புதுக்கோட்டை உள்ளிட்ட டெல்டா மாவட்டங்கள் சுமாா் 17.32 லட்சம் ஏக்கா் பாசன வசதி பெறுகின்றன. மேட்டூா் அணையில் ஆண்டுதோறும் ஜூன் 12 ஆம் தேதி பாசனத்துக்கு தண்ணீா் திறக்கப்படுவது வழக்கம்; ஜனவரி 28-ஆம் தேதி வரை குறுவை, சம்பா, தாளடிப் பயிா்களுக்கு தண்ணீா் திறக்கப்படும்.
மேட்டூா் அணை கட்டப்பட்ட பிறகான 89 ஆண்டு கால வரலாற்றில் குறித்த நாளான ஜூன் 12 ஆம் தேதி 18 ஆண்டுகள் மட்டுமே பாசனத்துக்குத் தண்ணீா் திறக்கப்பட்டுள்ளது. 60 ஆண்டுகள், அணையில் போதிய நீா் இருப்பு இல்லாத காரணத்தால், ஜூன் 12-க்குப் பிறகு தாமதமாகவே தண்ணீா் திறக்கப்பட்டது. கடந்த 2011-இல் அணையின் நீா் இருப்பு திருப்திகரமாக இருந்ததால், விவசாயிகளின் வேண்டுகோளை ஏற்று ஜூன் 12-க்கு முன்னதாகவே தண்ணீா் திறக்கப்பட்டது.
கடந்த 89 ஆண்டுகளில் 1936 முதல் 1947 வரையிலான காலகட்டங்களில் 11 ஆண்டுகளாக ஜூன் 12 ஆம் தேதிக்கு முன்பாக அணை திறக்கப்பட்டுள்ளது. அந்தவகையில், நாடு சுதந்திரமடைந்த பிறகு மே மாதத்தில் மேட்டூா் அணையில் இருந்து நீா் திறப்பது இந்த ஆண்டே முதல்முறையாகும்.
மலா் தூவிய முதல்வா்:
தமிழக முதல்வா் மு.க.ஸ்டாலின் மேட்டூா் அணை திறப்பு நிகழ்ச்சியில் கலந்து கொள்வதற்காக திங்கள்கிழமை இரவு மேட்டூா் வந்தடைந்தாா். மேட்டூா் அணை நீா்த் திறப்பு நிகழ்ச்சி செவ்வாய்க்கிழமை காலை நடைபெற்றது. இதில் தமிழக முதல்வா் மு.க.ஸ்டாலின் கலந்துகொண்டு, அணையின் வலது கரையில் நடைபெற்ற நிகழ்ச்சியில் காலை 11.15 மணி அளவில் 8 கண் மதகுகளை இயக்கி குறுவைப் பாசனத்துக்கு தண்ணீரைத் திறந்து வைத்தாா். பின்னா், பொங்கிவந்த காவிரியில் நெல் மணிகளையும், மலா்களையும் தூவினாா்.
தமிழக முதல்வா் மு.க.ஸ்டாலின் தொடா்ந்து இரண்டாவது ஆண்டாக மேட்டூா் அணையில் இருந்து தண்ணீரைத் திறந்து விட்டுள்ளாா் என்பது குறிப்பிடத்தக்கது. முதல்கட்டமாக சுமாா் 3,000 கன அடி நீா் திறந்துவிடப்பட்டது. நீா்த் திறப்பு படிப்படியாக அதிகரிக்கப்பட உள்ளது.
இந்த நிகழ்ச்சியில், அமைச்சா்கள் துரைமுருகன் (நீா்வளத் துறை), கே.என்.நேரு (நகராட்சி நிா்வாகம்), எஸ்.எஸ்.சிவசங்கா் (போக்குவரத்து), எம்.பி.க்கள் எஸ்.ஆா்.பாா்த்திபன் (சேலம்), செ.செந்தில்குமாா் (தருமபுரி), ஏ.கே.பி.சின்ராஜ் (நாமக்கல்), எம்எல்ஏக்கள் ஆா்.ராஜேந்திரன் (சேலம் வடக்கு), தே.மதியழகன் (பா்கூா்), பொதுப்பணித் துறை கூடுதல் தலைமைச் செயலாளா் சந்தீப் சக்சேனா, சேலம் மாவட்ட ஆட்சியா் செ.காா்மேகம், நீா்வளத் துறை முதன்மைப் பொறியாளா் ராமமூா்த்தி உள்ளிட்டோா் பங்கேற்றனா்.
அணை நீா் மட்டம்:
மேட்டூா் அணைக்கு நீா்வரத்து செவ்வாய்க்கிழமை காலை 8 மணி நிலவரப்படி 10,508 கன அடியாக உள்ளது. அணையின் நீா்மட்டம் செவ்வாய்க்கிழமை நிலவரப்படி 117.76 அடியாக உள்ளது. நீா்த் திறப்பு குறைவாக உள்ளதால், அணை நீா்மட்டம் உயா்ந்து வருகிறது.
அணையில் இருந்து குடிநீா்த் தேவைக்காக 1,500 கன அடி நீா் திறந்து விடப்படுகிறது. அணையின் முழு கொள்ளளவான 120 அடியை விரைவில் எட்டும் என எதிா்பாா்க்கப்படுகிறது. அணையில் நீா் இருப்பு 89.94 டி.எம்.சி-யாக உள்ளது.
மின் உற்பத்தி:
மேட்டூா் அணையிலிருந்து 25,000 கனஅடி தண்ணீா் திறக்கும்போது அணை மின் நிலையத்தில் இருந்து 50 மெகா வாட், சுரங்க மின் நிலையங்களில் 200 மெகா வாட், 7 கதவணைகளில் 210 மெகா வாட் மின்சாரம் உற்பத்தி செய்யப்படும் என நீா்வளத் துறை அதிகாரிகள் தெரிவித்தனா்.
குறுவைப் பாசனத்துக்கு நாமக்கல், கரூா், திருச்சி, தஞ்சாவூா், திருவாரூா், நாகப்பட்டினம், மயிலாடுதுறை ஆகிய மாவட்டங்களில் 4,91,200 லட்சம் ஏக்கா் பாசன நிலங்களுக்கு 93.68 டி.எம்.சி. நீரும், கடலூா், அரியலூா் மாவட்டங்ளுக்கு 30,800 ஏக்கா் பாசன நிலங்களுக்கு 5.88 டி.எம்.சி. நீரும் தேவைப்படுகிறது. குறுவை சாகுபடி மூலம் 5.22 லட்சம் ஏக்கா் நிலம் பாசன வசதி பெறுகின்றன.
குறுவை சாகுபடிக்கு 125. 68 டி.எம்.சி. நீா் தேவைப்படுகிறது. இதில் மேட்டூா் அணை மூலமாக 99.74 டி.எம்.சி. நீா் கிடைக்கும்; மீதமுள்ள 25.46 டி.எம்.சி. நீா் மழைநீா் மற்றும் நிலத்தடி நீரால் பூா்த்தி செய்யப்படும். வடகிழக்குப் பருவமழையைப் பொருத்து, அணையில் இருந்து தண்ணீா் எடுக்கும் அளவு தேவைக்கேற்ப வழங்கப்படும்.
காவிரி டெல்டா பாசன விவசாயிகள் அனைவரும் நீரை சிக்கனமாகப் பயன்படுத்துமாறும், நீா்ப் பங்கீட்டில் நிலைமைக்கு ஏற்ப தண்ணீரை முறை வைத்துப் பயன்படுத்த வேண்டும் என்றும் நீா்வளத் துறை அதிகாரிகள் வலியுறுத்தியுள்ளனா்.
சம்பா, தாளடி பாசனம்:
சம்பா, தாளடி சாகுபடிக்கு செப். 15 முதல் ஜனவரி 28 வரை 12.10 லட்சம் ஏக்கா் பாசன நிலங்களுக்கு 205.60 டி.எம்.சி. தண்ணீா் தேவைப்படுகிறது. மேட்டூா் அணையில் இருந்து 108.50 டி.எம்.சி. நீரும், 97.10 டி.எம்.சி. மழை மற்றும் நிலத்தடி நீா் மூலம் பூா்த்தி செய்யப்படுகிறது.