சேலம், செப். 18: சோனா கல்விக் குழுமம் சாா்பில் இயற்கை மருத்துவம் மற்றும் யோகா கல்வியுடன், ஆயுஷ் மருத்துவ சிகிச்சையகத்தை வெள்ளிக்கிழமை தொடங்கியுள்ளது.

இதுதொடா்பாக, சோனா கல்வி குழுமத்தின் துணைத் தலைவா் தியாகு வள்ளியப்பா கூறியது:

சோனா கல்லூரி பாரம்பரிய நடைமுறைகளையும் மருந்துகளையும் இளம் இந்தியாவின் நவீன தொழில்நுட்பத்துடன் இணைந்து உருவாக்குவதில் முனைப்பாக உள்ளது.

சோனா குழுமம் அதன் தொழில்நுட்ப வளாகத்தில் ஒரு ஆயுஷ் பல்நோக்கு பாரம்பரிய மருத்துவ சிகிச்சையகத்தை அமைத்து ஆயுா்வேதம், யோகா மற்றும் இயற்கை மருத்துவம், யுனானி, சித்தா மற்றும் ஹோமியோபதி ஆகியவற்றில் ஆலோசனை மற்றும் தரமான சுகாதார சேவைகளை வழங்கி வருகிறது.

சோனா மருத்துவக் கல்லூரியின் மேற்பாா்வையில் ஆயுஷ் சிகிச்சையகம் (இயற்கை மருத்துவம் மற்றும் யோகா) செயல்படும்.

சோனா ஆயுஷ் சிகிச்சையகத்தில் இயற்கை உணவுக்கு விரிவான முக்கியத்துவம் கொடுக்கிறது. மசாஜ், மண் சிகிச்சை, நீா் சிகிச்சை, நறுமணச் சிகிச்சை, குத்தூசி மருத்துவம், அக்குபிரஷா், கிஃப்ளெக்காலஜி, பிசியோதெரபி, ஆயுா்வேத மருந்துகள், சித்தா, யுனானி போன்ற இயற்கை மருத்துவச் சிகிச்சை முறைகளைப் பயன்படுத்தி நோய்களுக்கான சிகிச்சை வழங்கப்படும் என்றாா்.

பேட்டியின் போது சோனா கல்வி குழுமத்தின் தலைவா் வள்ளியப்பா, சோனா இயற்கை மற்றும் யோகா மருத்துவக் கல்லூரியின் முதல்வா் எஸ்.மதன்குமாா், ஆயுஷ் மருத்துவா்கள், கண் மருத்துவா் சசிகுமாா் மற்றும் சோனா கல்வி நிறுவனங்களின் முதல்வா்கள் உள்ளிட்டோா் உடனிருந்தனா்.