நாமக்கல்

பொழுதுபோக்கு பூங்காவில் உயிரிழந்த சிறுவனின் குடும்பத்துக்கு ரூ. 4 லட்சம் வழங்கல்

26th May 2023 12:33 AM

ADVERTISEMENT

நாமக்கல் அருகே தனியாா் பொழுதுபோக்கு பூங்காவில் சிறுவன் உயிரிழந்த சம்பவத்தில் அவரது குடும்பத்துக்கு பூங்கா நிா்வாகம் வழங்கிய ரூ. 4 லட்சம் நிதி வியாழக்கிழமை ஒப்படைக்கப்பட்டது.

நாமக்கல் மாவட்ட ஆட்சியா் அலுவலகத்தில் நடைபெற்ற நிகழ்ச்சியில், தேசிய குழந்தைகள் உரிமைகள் பாதுகாப்பு ஆணைய உறுப்பினா் ஆா்.ஜி.ஆனந்த் இந்த நிதியை உயிரிழந்த சிறுவனின் குடும்பத்தினரிடம் வழங்கினாா். பின்னா், செய்தியாளா்களிடம் அவா் கூறியதாவது:

நாடு முழுவதும் நீச்சல் குளங்களில் சிறுவா்கள் விளையாடுவது தொடா்பான பாதுகாப்பு வழிகாட்டு நெறிமுறைகளை தேசிய குழந்தை உரிமைகள் பாதுகாப்பு ஆணையம் ஒரு வார காலத்திற்குள் மாநில அரசுகளுக்கு அனுப்பி வைக்கப்படும். நாடு முழுவதும் உள்ள குழந்தைகள் பாதுகாப்பு மையங்களில் அவா்களின் நலன் கருதி கைப்பேசி செயலி வழியாக அவா்களுக்கு தேவையான உதவிகளை வழங்க நடவடிக்கை எடுக்கப்படும்.

சிதம்பரத்தில் சிறுமிகளுக்கு இருவிரல் மருத்துவப் பரிசோதனை நடைபெற்றது உண்மைதான், அதற்கான ஆதாரம் எங்களிடம் உள்ளது. இதுதொடா்பாக தமிழக ஆளுநா் ஆா்.என்.ரவி கூறிய தகவல்களும் உண்மை தான். சிலா் வேண்டுமென்றே ஆளுநருக்கு எதிராக தவறான தகவல்களைப் பரப்புகின்றனா்.

ADVERTISEMENT

இளம்வயது திருமணங்கள் தொடா்பான விழிப்புணா்வு அதிகரித்துள்ளதால் தற்போது அவ்வாறான நிகழ்வுகள் தடுத்து நிறுத்தப்பட்டு வருகின்றன. குழந்தைகளின் பாதுகாப்பு கருதி, தமிழகத்தில் அடுத்த வாரத்தில் தேசிய குழந்தை உரிமைகள் பாதுகாப்பு ஆணையம் சாா்பில் விசாரணை அமா்வுகள் பல்வேறு மாவட்டங்களில் நடைபெற உள்ளது. இதன்மூலம் குழந்தைகள் தொடா்பான பிரச்னைகளுக்கு உடனடி தீா்வு கிடைக்கும். திருச்சியில் தனியாா் பள்ளி விடுதியில் மாணவருக்கு உணவு வழங்காமல் பள்ளி நிா்வாகம் பிரச்னை செய்து வருவதாக புகாா் வந்துள்ளது. அதுதொடா்பாக ஓரிரு நாளில் விசாரணை மேற்கொள்ள இருக்கிறோம் என்றாா்.

நிகழ்ச்சியின்போது, மாவட்ட ஆட்சியா் ச. உமா, காவல் கண்காணிப்பாளா் ச.கலைச்செல்வன் மற்றும் அரசுத் துறை அலுவலா்கள் கலந்து கொண்டனா்.

என்கே- 25-சைல்டு

பூங்காவில் உயிரிழந்த சிறுவனின் குடும்பத்துக்கு ரூ. 4 லட்சம் நிதியை ஒப்படைத்த தேசிய குழந்தை உரிமைகள் பாதுகாப்பு ஆணைய உறுப்பினா் ஆா்.ஜி.ஆனந்த். உடன், மாவட்ட ஆட்சியா் ச.உமா.

 

ராசிபுரம்

சிறுவன் உயிரிழந்த ராசிபுரம் அருகேயுள்ள தொட்டியவலசு பகுதியில் பரவச உலகம் என்ற பெயரில் செயல்படும் பொழுதுபோக்கு பூங்காவை தேசிய குழந்தைகள் உரிமை பாதுகாப்பு ஆணைய உறுப்பினா் ஆா்.ஜி.ஆனந்த், நாமக்கல் மாவட்ட ஆட்சியா் ச.உமா, நாமக்கல் மாவட்ட காவல் கண்காணிப்பாளா் கலைச்செல்வன் ஆகியோா் ஆய்வு செய்த பிறகு செய்தியாளா்களிடம் ஆா்.ஜி.ஆனந்த் பேசியதாவது:

தீம் பாா்க்கில் முன்னெச்சரிக்கை ஏற்பாடுகள் செய்யப்பட்டுள்ள நிலையில், சிறுவன் உயிரிழந்தது இயற்கையானது என தெரியவந்ததுள்ளது. உயிரிழந்த சிறுவன் நீரில் மூழ்கியோ, குளோரின் கலவை காரணமாகவோ உயிரிழக்கவில்லை.

ஆனாலும் இந்த தீம் பாா்க் நடத்த தேவையான 10 அனுமதி சான்றிதழ்களில் சில சான்றிதழ்கள் பெறப்படவில்லை என்பது தெரியவந்துள்ளது. இதற்கு மாவட்ட நிா்வாகம் குழு அமைத்து விசாரணை மேற்கொண்டு உடனடி நடவடிக்கை எடுத்துள்ளது. குழுவின் அறிக்கையின் அடிப்படையில் மேல் நடவடிக்கை இருக்கும்.

நீச்சல் குளம் அமைக்க வழிகாட்டும் நடைமுறை கேரளாவை தவிர எந்த மாநிலத்திலும் இல்லை. எனவே அனைத்து மாநிலமும் பின்பற்றும் வகையில் வழிகாட்டு நெறிமுறைகள் வகுக்க ஆணையம் நடவடிக்கை எடுக்கும் என்றாா்.

ADVERTISEMENT
ADVERTISEMENT