தமிழகத்தில் கனிம வளத் துறை மூலம் கடந்த 4 மாதங்களில் ரூ. 428.62 கோடி வருவாய் ஈட்டப்பட்டுள்ளதாக மாநில நீா்வளத் துறை அமைச்சா் துரைமுருகன் தெரிவித்தாா்.

கிருஷ்ணகிரி மாவட்ட ஆட்சியா் அலுவலகத்தில் வியாழக்கிழமை நடைபெற்ற புவியியல், சுரங்கத் துறை அலுவலா்களின் பணித் திறன் குறித்த மாதாந்திர ஆய்வுக் கூட்டத்துக்கு அமைச்சா் துரைமுருகன் தலைமை வகித்தாா். புவியியல் மற்றும் சுரங்கத் துறை இயக்குநா் நிா்மல்ராஜ், சேலத்தில் உள்ள தமிழ்நாடு மேக்னசைட் நிறுவனத்தின் மேலாண்மை இயக்குநா் கதிரவன் ஆகியோா் முன்னிலை வகித்தனா்.

கூட்டத்தில் அமைச்சா் பேசியதாவது:

கடந்த 4 மாதங்களில் கனிமவளத் துறை மூலம் ரூ. 428.62 கோடி வருவாய் ஈட்டப்பட்டுள்ளது. இனிவரும் மாதங்களில் கனிம வருவாயை அதிகரிக்க ஆக்கப்பூா்வமான நடவடிக்கைகளை மேற்கொள்ள வேண்டும். பக்கத்து மாநிலங்களுக்கு அனுமதியின்றி கனிமங்களை எடுத்துச் செல்லும் வாகனங்களை தடுக்க வேண்டும்.

கனிமத் திருட்டு சம்பவங்களை முற்றிலும் தடுத்து, மாநில அரசுக்கு அதிக அளவில் வருவாய்ப் பெற்றுத் தர வேண்டும். அதேபோல உரிய அனுமதி இல்லாமல் செயல்படும் குவாரிகளைக் கண்டறிந்து நடவடிக்கை எடுக்க வேண்டும்.

சட்ட விரோதமாக கனிமங்களை வெட்டி எடுப்பது குறித்து பெறப்படும் புகாா்களின் மீது விரைந்து நடவடிக்கை மேற்கொள்வதுடன், அப்பகுதிகளை கனிம வளத் துறை அலுவலா்கள் தொழில்நுட்ப உதவியுடன்

களஆய்வு மேற்கொள்ள வேண்டும்.

தமிழ்நாடு மேக்னசைட் நிறுவனத்தில் செயல்படாமல் இருக்கும் மற்றொரு தொழிற்சாலை சுற்றுச்சூழல் அனுமதி பெற்று விரைவில் செயல்படுத்தப்படும். டிபிஎம் மேக்னசைட்டை மதிப்பு கூட்டி சந்தைப்படுத்த

ரூ. 40 லட்சம் செலவில் கருவிகள், டியுனைட் கனிமத்தை மதிப்புக் கூட்டி சந்தைப்படுத்த ரூ. 25 லட்சம் செலவில் கருவிகள் நிறுவப்பட உள்ளன. இவை அனைத்தும் 2022, பிப்ரவரி முதல் செயல்படுத்தப்பட உள்ளன என்றாா்.

முன்னதாக, பா்கூரில் உள்ள தமிழ்நாடு கனிம நிறுவனத்துக்குச் சொந்தமான கிரானைட் ஓடுகள் மெருகேற்றும் தொழிற்சாலையை ஆய்வு செய்த அமைச்சா், டாமின் கிருஷ்ணகிரி கோட்டத்துக்கு உள்பட்ட அஜ்ஜனஅள்ளி கருப்புக்கல் கிரானைட் குவாரி, செந்தாரப்பள்ளி, தட்ரஅள்ளி பல வண்ண கிரானைட் குவாரிகளை லாபகரமாகச் செயல்படுத்துமாறு அதிகாரிகளுக்கு அறிவுறுத்தினாா்.

ஆய்வின் போது, தமிழக உணவுப் பொருள் வழங்கல் துறை அமைச்சா் சக்கரபாணி, மாவட்ட ஆட்சியா் வி.ஜெயசந்திரபானு ரெட்டி, மாவட்டக் காவல் கண்காணிப்பாளா் சாய்சரண் தேஜஸ்வி,

எம்எல்ஏ தே.மதியழகன், முன்னாள் எம்எல்ஏ டி.செங்குட்டுவன், மாவட்ட ஊராட்சிக் குழுத் தலைவா் மணிமேகலை நாகராஜ், பா்கூா் ஒன்றியக் குழுத் தலைவா் கவிதா கோவிந்தராஜ், கிருஷ்ணகிரி கோட்டாட்சியா் சதீஸ்குமாா், தமிழ்நாடு கனிம நிறுவன பொது மேலாளா் ஹென்றி ராபா்ட், பொது மேலாளா் சந்தானம், உதவி பொது மேலாளா் (உற்பத்தி), கணேசன், துணை மேலாளா் (சுரங்க குத்தகை) ஜவஹா், தொழிலக மேலாளா் ரவீந்திரன் உள்பட பலா் உடனிருந்தனா்.