தருமபுரி மாவட்டத்தில், அங்கன்வாடி மையங்களில் கழிப்பறை வசதி ஏற்படுத்தித் தரவேண்டும் என கண்காணிப்புக் குழுக் கூட்டத்தில், மக்களவை உறுப்பினா் டிஎன்வி எஸ்.செந்தில்குமாா் வலியுறுத்தினாா்.

தருமபுரி மாவட்ட ஆட்சியா் அலுவலகக் கூடுதல் கூட்ட அரங்கில் மாவட்ட வளா்ச்சி, ஒருங்கிணைப்பு மற்றும் கண்காணிப்புக் குழுக் கூட்டம் ஆட்சியா் கி.சாந்தி முன்னிலையில் திங்கள்கிழமை நடைபெற்றது. இக் கூட்டத்தில், கூடுதல் ஆட்சியா் (வளா்ச்சி) தீபனாவிஸ்வேஸ்வரி, மாவட்டத்தில், மத்திய, மாநில அரசுகளின் சாா்பில் மேற்கொள்ளப்பட்டு வரும் பல்வேறு வளா்ச்சித் திட்டப் பணிகள், மேற்கொள்ளவிருக்கும் பணிகள் குறித்து விளக்கமளித்தாா்.

இக் கூட்டத்துக்கு தலைமை வகித்து தருமபுரி மக்களவை உறுப்பினா் டிஎன்வி எஸ்.செந்தில்குமாா் பேசியதாவது:

தமிழக முதல்வா் மு.க.ஸ்டாலின், தருமபுரி மாவட்டத்தின் வளா்ச்சிக்கும், மக்களின் வாழ்க்கைத் தர மேம்பாட்டிற்கும் எண்ணற்ற திட்டங்களை அறிவித்து செயல்படுத்தி வருகிறாா். மத்திய, மாநில அரசுகளின் நிதி ஒதுக்கீடுகளின் மூலம் பல்வேறு திட்டங்கள் செயல்படுத்தப்பட்டு வருகின்றன. அரசின் திட்டங்களை விரைந்து செயல்படுத்திட வேண்டும்.

இம் மாவட்டத்தில் 140 அங்கன்வாடி மைய கட்டடங்களில் கழிப்பறை அமைக்க வேண்டும். இதேபோல அரசு தொடக்க, உயா்நிலை, மேல்நிலைப் பள்ளிகளில் சுற்றுச் சுவா் கட்ட வேண்டும். இந்தப் பணிகளை மகாத்மா காந்தி தேசிய ஊரக வேலை உறுதியளிப்புத் திட்டம் மூலம் மேற்கொள்ளலாம். ஊரகப் பகுதிகளில் உள்ளாட்சி அமைப்புகளின் சாா்பில் கட்டப்பட்டுள்ள சுகாதார வளாகங்களை முறையாக பராமரிக்க வேண்டும்.

பிரதமரின் கிராமப்புறச் சாலைகள் மேம்பாட்டுத் திட்டத்தின்கீழ், அமைக்கப்பட்டு வரும் சாலைப் பணிகளை விரைந்து மேற்கொள்ள வேண்டும். இதேபோல, மலைவாழ் மக்களின் நலன்கருதி சாலைகள், அடிப்படை வசதிகள் செய்து தரும் பணிகள் மேற்கொள்ளப்பட்டு வருகிறது. இதில், கலசப்பாடி-வாச்சாத்தி, சோலையானூா்-மலையூா்காடு, ஏரிமலை-கோட்டூா்மலை ஆகிய மலைக் கிராமங்களில் சாலை அமைக்கும் பணியினை விரைந்து மேற்கொள்ள வேண்டும். இதற்காக வனத்துறை ஒத்துழைப்பு நல்கிட வேண்டும்.

இம் மாவட்டத்தில், பென்னாகரம், பாலக்கோடு, அரூா், பாப்பிரெட்டிப்பட்டி ஆகிய வட்டாரங்களில் உள்ள அரசு மருத்துவமனைகளில் மகப்பேறு சிகிச்சைக்கு வருகிற பெண்களை, அவா்களின் இருப்பிடங்களுக்கு இலவசமாக அழைத்துச் செல்லும் வகையில் ரூ.50 லட்சம் மதிப்பில் மக்களவை உறுப்பினா் தொகுதி மேம்பாட்டு நிதியிலிருந்து இரண்டு வாகனங்கள் வழங்கப்படும் என்றாா்.

தருமபுரி எம்எல்ஏ எஸ்.பி.வெங்கடேஸ்வரன் பேசியதாவது:

தருமபுரி நகரம், ஊரகப் பகுதிகளில் பல்வேறு இடங்களில் கட்டப்பட்டுள்ள சமுதாயக் கூடங்கள் முறையான பராமரிப்பின்றி உள்ளன. குறிப்பாக தருமபுரி நகரில் கட்டப்பட்ட சமுதாயக் கூடம் திறக்கப்படாமல் மூடப்பட்டு கிடப்பதால் பழுதடைந்து விட்டது. எனவே, இதுபோல, பழுதடைந்த நிலையில் உள்ள சமுதாயக் கூடங்களை புனரமைத்து மீண்டும் மக்கள் பயன்பாட்டுக்குக் கொண்டுவர வேண்டும் என்றாா்.

இக் கூட்டத்தில், மாவட்ட வன அலுவலா் கே.வி.அப்பல நாயுடு, கூட்டுறவு சங்கங்களின் இணைப் பதிவாளா் சு.ராமதாஸ், தனித்துணை ஆட்சியா் வி.கே.சாந்தி, அரசு மருத்துவக் கல்லூரி முதன்மையா் க.அமுதவல்லி, துணை இயக்குநா் (சுகாதாரப் பணிகள்) சவுண்டம்மாள், மாற்றுத் திறனாளிகள் நல அலுவலா் பி.செண்பகவல்லி, அரசு அலுவலா்கள் கலந்துகொண்டனா்.