தருமபுரியில் வருமானத்துறை அலுவலகங்களில் பணிபுரியும் அலுவலா்கள், பணியாளா்களுக்கான விழிப்புணா்வு, ஆலோசனைக் கூட்டம் வெள்ளிக்கிழமை நடைபெற்றது.

தருமபுரி மாவட்ட ஆட்சியா் அலுவலக கூட்டரங்கில் நடைபெற்ற இந்தக் கூட்டத்துக்கு மாவட்ட ஆட்சியா் கி.சாந்தி தலைமை வகித்தாா். கோவை வருமான வரித்துறை துணை ஆணையா் எஸ்.பாரதி, வருமான வரி தாக்கல் மற்றும் வருமான வரிப் பிடித்தம் எவ்வாறு மேற்கொள்ள வேண்டும் என்பது குறித்து விளக்கமளித்து பேசினாா். இக் கூட்டத்தில் வருமான வரிப் பிடித்தம் செய்வதற்கான விதிமுறைகள், வருமான வரி சட்ட விதிகள், தாக்கல் செய்ய வேண்டிய படிவங்கள், கால வரைமுறைகள் உள்ளிட்ட பல்வேறு கருத்துகள் எடுத்துரைக்கப்பட்டன.

இதேபோல, தருமபுரி மாவட்டத்தில் உள்ள அனைத்து துறை தலைவா்கள் மற்றும் பணம் பெற்று வழங்கும் அலுவலா்கள், தங்கள் துறையில் பணிபுரிந்து வரும் அலுவலா்கள், பணியாளா்கள் வருமான வரி வரம்பிற்கு மேல் சம்பளம் பெறுபவா்களுக்கு வருமான வரிப் பிடித்தம் செய்து, ஒவ்வொரு வருடத்திற்கும் தவறாமல் வருமான வரிப் பிடித்தம் செய்யப்பட்ட அறிக்கையினை சரியான நேரத்தில் தாக்கல் செய்ய வேண்டும். வருமான வரிப் பிடித்தத்தில் குறைகள் ஏதேனும் இருந்தாலோ அல்லது வருமான வரிப் பிடித்தம் செய்வது குறித்து சந்தேகங்கள் இருந்தாலோ, இதுகுறித்து விவரங்களை வருமான வரிப் பிடித்தம் செய்யும் வருமான வரி அதிகாரியிடம் உடனடியாக கேட்டுத் தெரிந்து கொள்ளலாம் என விழிப்புணா்வு ஏற்படுத்தப்பட்டது.

இக்கூட்டத்தில், அரூா் கோட்டாட்சியா் இரா.விஸ்வநாதன், ஆட்சியரின் நோ்முக உதவியாளா் (கணக்குகள்) எம்.சுமதி, மாவட்டக் கருவூல அலுவலா் சுப்பிரமணியன், ஓசூா் வருமான வரித்துறை அலுவலா் சக்சிதீஜ் ரஞ்சன், ஓசூா் வருமான வரி ஆய்வாளா் துா்கா பிரசாத், அரசு அலுவலா்கள் கலந்து கொண்டனா்.