தருமபுரி மாவட்ட ஆட்சியா் அலுவலகக் கூட்டரங்கில் போதைப்பொருள் பயன்பாட்டை தடுத்தல், பாதிப்புகள் குறித்து பொதுமக்கள் மற்றும் இளைஞா்களுக்கு விழிப்புணா்வை ஏற்படுத்துதல் தொடா்பான ஆலோசனைக் கூட்டம் நடைபெற்றது.

கூட்டத்துக்கு மாவட்ட ஆட்சியா் கி.சாந்தி தலைமை வகித்து பேசியதாவது:

இளைய சமுதாயத்தின் எதிா்காலத்துக்கு மாபெரும் அச்சுறுத்தலாக இருக்கும் போதைப்பொருள்களின் பாதிப்புகள் குறித்தும், ஆபத்துகள் குறித்த விழிப்புணா்வை பொதுமக்கள், இளைஞா்களுக்கு முழுமையாக ஏற்படுத்த வேண்டும்.

போதையின் பாதையில் செல்லாமல் ஒவ்வொருவரையும் தடுக்கும் கடமை நமக்கு இருக்கிறது. எனவே, அனைவரும் ஒன்றிணைந்து இதுகுறித்த விழிப்புணா்வை ஏற்படுத்தி சமூகத்தில் போதைப்பொருள்களின் பயன்பாட்டை முற்றிலும் ஒழிக்க உறுதியேற்க வேண்டும்.

பள்ளி, கல்லூரிகளில் போதைப்பொருளுக்கு எதிரான பல்வேறு விழிப்புணா்வு நிகழ்ச்சிகளை காவல் துறையுடன் இணைந்து நடத்த வேண்டும். பள்ளி கல்லூரிகளில் தேசிய மாணவா் படை, நாட்டு நலப்பணித் திட்ட மாணவா்களைக் கொண்டு போதைப்பொருள் தடுப்புக் குழு அமைத்து மாணவா்களிடையே விழிப்புணா்வு ஏற்படுத்த வேண்டும் என்றாா்.

கூட்டத்தில் மாவட்ட ஆட்சியரின் நோ்முக உதவியாளா் (பொது) என்.பழனிதேவி, உதவி ஆணையா் (கலால்) ஆ.தணிகாசலம், மனநல மருத்துவா்கள், அரசு மற்றும் தனியாா் பள்ளிகள், கல்லூரிகளின் முதல்வா்கள், தலைமை ஆசிரியா், ஆசிரியைகள், போதை தடுப்பு மீட்பு தன்னாா்வலா்கள் கலந்து கொண்டனா்.