தருமபுரியில் உள்ள அருங்காட்சியகம், அதியமான்கோட்டையில் உள்ள வள்ளல் அதியமான் கோட்டத்துடன் இணைத்து அமைக்கப்படும் என தமிழக அரசு அறிவித்திருப்பதை அடுத்து, தற்போதைய அகழ்வைப்பகத்தில் உள்ள வரலாற்று பொக்கிஷங்களுக்கு நிரந்தரஅமைவிடம் கிடைக்க உள்ளது.

தருமபுரி மாவட்டம், சங்க காலத்தில் அதியமான் நெடுமான் அஞ்சி மன்னரின் ஆட்சிக்கு உள்பட்ட பகுதியாக இருந்தது. இதைத் தொடா்ந்து, இந்தப் பகுதி கங்கா்கள், நுளம்பா்கள், ராஷ்டிரகூடா்கள், சோழா்கள், ஹொய்சாளா்கள், விஜயநகர பேரரசு உள்ளிட்ட சிற்றரசா்கள், பேரரசுகளின் ஆளுகைக்கு உள்பட்ட பகுதியாக இருந்தது. விடுதலைக்கு முன், பாராமஹால் என்றழைக்கப்பட்ட, மைசூா் சமஸ்தானத்தின் கட்டுப்பாட்டிலிருந்த தருமபுரி பகுதி, கா்நாடகப் போா்கள் மூலம் ஆங்கிலேயா் வசம் சென்றடைந்தது.

சுமாா் 3,000 ஆண்டுகளாக இங்குள்ள மலைப்பகுதிகளில் மக்கள் வாழ்ந்ததற்கான ஏராளமான வரலாற்றுச் சின்னங்கள் தற்போதும் கிடைக்கின்றன. சிற்றரசுகள் மற்றும் பேரரசுகளின் கட்டுப்பாட்டில் இருந்த இந்தப் பகுதியில் நடுகற்கள், சிலைகள், கல்வெட்டுக்கள் என வரலாற்றுப் பொக்கிஷங்கள் அதிக அளவில் காணப்படுகின்றன. இந்த மாவட்டத்தில், கிராமப்புறங்கள், வயல்வெளிகள், கோயில்கள் என பல பகுதிகளில் நடுகற்கள் கிடைத்துள்ளன. இதனால், தருமபுரியில் அமைந்துள்ள அகழ் வைப்பகம், ‘நடுகற்கள் காட்சியகம்’ என்று வரலாற்று ஆய்வாளா்களால் அழைக்கப்படுகிறது.

தருமபுரி மாவட்டத்தில், கிடைத்த நடுகற்கள், பெருங்கற்காலம், புதிய கற்காலத்தைச் சோ்ந்த பொருள்கள், சமணச் சிற்பங்கள், வைணவச் சிலைகள், சுடுமண் பேழைகள், ஈமப் பேழைகள், பனையோலைச் சுவடிகள், பழங்கால நாணயங்கள், பீரங்கி, வாள் ஆகியவை சேகரிக்கப்பட்டு, தொல்லியல் துறை சாா்பில், தருமபுரி பேருந்து நிலையம் அருகே கடந்த 1979-இல் அகழ்வைப்பகம் அமைக்கப்பட்டது. இதில் வரலாற்றுச் சின்னங்கள் யாவும் காட்சிப்படுத்தப்பட்டுள்ளன.

கிடைத்தற்கரிய இந்த வரலாற்றுப் பொக்கிஷங்கள் போதிய பாதுகாப்பில்லாமல் தற்போதுள்ள கட்டடத்திலும், அதன் முன்பகுதியில் அமைந்துள்ள திறந்தவெளியிலும் வைக்கப்பட்டுள்ளன.

தருமபுரி மண்ணின் பெருமையையும், பண்பாட்டையும், வரலாற்றுப் பெருமையையும் வருங்காலத் தலைமுறைக்கு உணா்த்தும் ஆதாரங்களாக விளங்கும் இவற்றை, பாதுகாப்பான தனி கட்டடத்தில் காட்சிப்படுத்த வேண்டும் என வரலாற்று ஆய்வாளா்கள், தொல்லியல் ஆா்வலா்கள் தொடா்ந்து அரசுக்கு கோரிக்கை விடுத்து வந்தனா்.

தருமபுரி சட்டப்பேரவை உறுப்பினா் எஸ்.பி.வெங்கடேஸ்வரன், தருமபுரி பேருந்து நிலையம் அருகே உள்ள அருங்காட்சியகத்துக்கு போதிய பாதுகாப்புடன் தனியாக கட்டடம் அமைக்க வேண்டும் என பேரவையில் ஏப். 7-ஆம் தேதி வலியுறுத்திப் பேசினாா்.

அதற்குப் பதிலளித்துப் பேசிய மாநில தொழில் துறை அமைச்சா் தங்கம் தென்னரசு, தருமபுரி நகரில் உள்ள அருங்காட்சியகம், அதியமான்கோட்டையில் உள்ள வள்ளல் அதியமான் கோட்டத்துடன் இணைத்து அமைக்கப்படும் எனத் தெரிவித்தாா்.

இதன் மூலம், தருமபுரி நகரில் உள்ள அருங்காட்சியகம் விரைவில் சொந்தக் கட்டடத்தில் அமைவது உறுதியாகியுள்ளது. இந்த அறிவிப்பை, பல்வேறு தரப்பினா் வரவேற்றுள்ளனா்.

இதுகுறித்து, தருமபுரி அதியமான் வரலாற்றுச் சங்கச் செயலரும், முன்னாள் மக்களவை உறுப்பினருமான இரா.செந்தில் கூறியது:

தருமபுரி மாவட்டம், தொன்மையான வரலாற்றுச் சிறப்புகளைக் கொண்ட மாவட்டமாகும். தற்போது தருமபுரி பகுதியில் உள்ள நெடுஞ்சாலை போன்று, மன்னா் அதியமான் காலத்திலேயே அமைந்திருந்தது. அதனை ‘அதியமான் பெருவழி’ என்று அழைத்ததற்கான சான்றுகள் கிடைத்துள்ளன.

இதுவரை மாவட்டத்தில் கிடைத்த வரலாற்றுச் சின்னங்கள், இந்த அருங்காட்சியகத்தில் வைக்கப்பட்டுள்ளன. இவை தவிர, ஆங்காங்கே நடுகற்கள் உள்ளிட்ட வரலாற்று ஆதாரங்கள் தொடா்ந்து கிடைக்கின்றன. வரலாற்றுப் பாரம்பரியம் இந்த மண்ணுக்கு ஏராளம் உண்டு.

தருமபுரி மாவட்டம், பங்குநத்தம் பகுதி பாதுகாக்கப்பட்ட தொன்மையான பகுதியாக அரசால் அறிவிக்கப்பட்டுள்ளது. பெரும்பாலை பாலாறு நதிக்கரையில் அகழாய்வு செய்யப்படும் என தமிழக அரசு அறிவித்துள்ளது. இவை யாவும் இந்த மண்ணின் வரலாற்றுப் பெருமையை உணா்த்துகின்றன.

தருமபுரி அருங்காட்சியகம் அதியமான்கோட்டையில் அமைக்கப்படும் என்கிற அரசின் அறிவிப்பை தருமபுரி அதியமான் வரலாற்றுச் சங்கம் வரவேற்கிறது. வரலாற்றை மறந்த சமூகம் தொடா்ந்து தவறு செய்யும் என்று கூறுவா். எனவே, நமது வரலாற்றுப் பெருமைகளை வருங்கால இளைஞா்களுக்கு எடுத்துரைக்க வேண்டிய அவசியம் உள்ளது.

தற்போது அறிவிக்கப்பட்டுள்ள அருங்காட்சிகத்தை பள்ளி, கல்லூரி மாணவா்கள் பாா்வையிட்டுச் செல்லும் வகையில் அமைக்க வேண்டும். மாவட்டத்தின் பல பகுதிகளில் கிடைக்கும் தொல்லியல் சான்றுகளைச் சேகரித்து வைக்கும் வகையில் போதிய வசதியுடன் இதனை அமைக்க வேண்டும் என்றாா்.