ஈரோடு கிழக்கு தொகுதி இடைத்தோ்தலில் திமுக கூட்டணி அமோக வெற்றிபெறும் என்று மனிதநேய மக்கள் கட்சித் தலைவா் ஜவாஹிருல்லா நம்பிக்கை தெரிவித்துள்ளாா்.

திருப்பூரில் மனிதநேய தொழிற்சங்க மாநில செயற்குழு கூட்டம் ஞாயிற்றுக்கிழமை நடைபெற்றது. இதில் பங்கேற்ற மனிதநேய மக்கள் கட்சித் தலைவா் ஜவாஹிருல்லா செய்தியாளா்களிடம் கூறியதாவது:

மத்திய அரசு 44 வகையான சட்டங்களை நீக்கி 4 தொகுப்புச்சட்டங்களாகக் கொண்டுவந்துள்ளது. இந்த தொகுப்பு சட்டங்கள் அமைப்புசாரா தொழிலாளா்களின் உரிமைகளைக் பறிக்கக்கூடிய வகையில் அமைந்துள்ளன. எனவே, தமிழக அரசு 4 தொகுப்பு சட்டங்களையும் ஏற்றுக் கொள்ளக்கூடாது என்று தீா்மானம் நிறைவேற்றப்பட்டுள்ளது.

தமிழகத்தில் வீட்டுப் பணியாளா்களுக்கு பணி பாதுகாப்பு, ஊதிய நிா்ணயம், வாரவிடுமுறை ஆகியவற்றை நடைமுறைப்படுத்த வேண்டும்.

பாஜக, ஆா்.எஸ்.எஸ். அமைப்புக்கு ஆதரவாளரான வழக்குரைஞா் விக்டோரியா கெளரியை சென்னை உயா்நீதிமன்ற நீதிபதியாக நியமிக்கக்கூடாது. அவா் நீதிபதியாக பணியமா்த்தப்பட்டால் சிறுபான்மையினருக்கு சரியான நீதி கிடைக்காது. இந்த விவகாரத்தில் தமிழக அரசும் உச்சநீதிமன்றத்துக்கு பரிந்துரை செய்ய வேண்டும்.

ஈரோடு கிழக்கு தொகுதி இடைத்தோ்தலில் திமுக கூட்டணி அமோக வெற்றிபெறும். பாஜகவிடம் அதிமுகவை அடமானம் வைத்துவிட்ட பின்னா் மாநில உரிமைகளை நிலைநாட்டலாம் என்று இபிஎஸ், ஓபிஎஸ் கற்பனை செய்துகூடப் பாா்க்கமுடியாது. நாம் தமிழா் கட்சி ஒருங்கிணைப்பாளா் சீமான் பாஜகவுக்கு ஆதரவாக செயல்பட்டு வருகிறாா். திராவிடக் கொள்கைக்கு ஆதரவான வாக்குகளைப் பிரிக்க பாஜகவால் கொம்புசீவிவிடப்பட்டவா் சீமான் என்றாா்.