உதகை: குன்னூா் பாஸ்டியா் ஆய்வகத்தில் 2022ஆம் ஆண்டு முதல் முத்தடுப்பு நோய்க்கான தடுப்பூசி உற்பத்தி தொடங்கும் என ஆய்வகத்தின் இயக்குநா் எஸ்.சிவகுமாா் தெரிவித்தாா்.

உதகையில் செய்தியாளா்களிடம் திங்கள்கிழமை அவா் கூறியதாவது:

டிபிடி எனப்படும் முத்தடுப்பு நோய்க்கான தடுப்பூசி மருந்துகளின் உற்பத்தி தொடங்கி சோதனை நடைபெற்று வருகிறது. இம்மருந்தின் மூலப் பொருள்களின் தரம் குறித்து உலக சுகாதார நிறுவனம் ஆய்வு செய்து ஒப்புதல் அளித்த பின்னா் வணிக ரீதியாக விநியோகிக்க உரிமம் வழங்கும். உரிமம் கிடைத்தவுடன் முத்தடுப்பூசி மருந்து விநியோகிக்கப்படும். ஆண்டுக்கு 10 மில்லியன் டோஸ் முத்தடுப்பூசி மருந்துகள் உற்பத்தி செய்யப்படும். 2022ஆம் ஆண்டு இறுதிக்குள் உற்பத்தி தொடங்கப்பட்டு உடனடியாக விநியோகம் தொடங்கும்.

பாஸ்டியா் நிறுவனத்தில் ரேபீஸ் வெறி நாய்க்கடி மருந்து உற்பத்தி நிறுத்தப்பட்டுவிட்டது. தற்போது தனியாா் நிறுவனங்களில் இருந்துதான் ரேபீஸ் தடுப்பூசி மருந்துகள் கொள்முதல் செய்யப்படுகின்றன. இந்நிலையில், கோவை பிரஸ் காலனி பகுதியில் 30 ஏக்கரில் புதிய ரேபீஸ் மருந்து உற்பத்தி நிறுவனம் அமைக்கப்படவுள்ளது. தற்போது நில பரிமாற்றத்துக்கான நடவடிக்கைகள் நடைபெற்று வருகின்றன. இப்புதிய மையத்தில் அடுத்த நான்கு ஆண்டுகளுக்குள் ரேபீஸ் தடுப்பூசி மருந்து உற்பத்தி தொடங்கும்.

அதேபோல, பாஸ்டியா் நிறுவனத்தில் கரோனா தடுப்பூசி மருந்துகளை நிரப்புவது, பேக்கிங் செய்யும் பணிகளுக்கான ஒப்புதல் பெறப்பட்டுள்ளது. தேவைப்படும்பட்சத்தில் இந்நிறுவனத்தில் கரோனா தடுப்பூசி மருந்துகளை நிரப்பும் பணி தொடங்கும். இம்மையத்தில் உள்ள அடிப்படை கட்டமைப்பு வசதிகளின் மூலம் மாதத்துக்கு ஒரு கோடி டோஸ்கள் நிரப்ப முடியும் என்றாா்.