ஈரோடு கிழக்கு தொகுதி இடைத்தோ்தலில் அதிமுக தனித்து களம் காண்கிறது என முன்னாள் அமைச்சா் கே.ஏ.செங்கோட்டையன் தெரிவித்தாா்.

ஈரோடு பி.பெ.அக்ரஹாரம் பகுதியில் சனிக்கிழமை நடைபெற்ற நிா்வாகிகள் ஆலோசனைக் கூட்டத்தில் பங்கேற்ற முன்னாள் அமைச்சா் கே.ஏ.செங்கோட்டையன் எம்எல்ஏ செய்தியாளா்களிடம் கூறியதாவது: ஈரோடு கிழக்குத் தொகுதி இடைத்தோ்தல் முடிவை உலகம் முழுவதும் உள்ள தமிழா்கள் எதிா்பாா்க்கின்றனா். திண்டுக்கல் மக்களவைத் தொகுதி இடைத்தோ்தல் எம்ஜிஆருக்கு திருப்புமுனையை உருவாக்கியதுபோல், ஈரோடு கிழக்கு சட்டப் பேரவைத் தொகுதி இடைத்தோ்தலில் அதிமுக மகத்தான வெற்றிபெற்று எடப்பாடி பழனிசாமி தலைமைக்கு திருப்புமுனையை ஏற்படுத்திக் கொடுக்கும். இந்தத் தோ்தல் தமிழகத்தில் மாற்றத்தை உருவாக்கும்.

அதிமுக இந்த இடைத்தோ்தலில் தனித்து களம் காண்கிறது. இந்தத் தோ்தலில் எங்களுக்கு ஆதரவளிக்கும் கட்சிகள் குறித்து எடப்பாடி பழனிசாமி விரைவில் அறிவிப்பாா். அதிமுகவில் 98.5 சதவீதம் போ் எடப்பாடி பழனிசாமி தலைமையை ஏற்றுக்கொண்டு கட்சிப் பணியாற்றி வருகின்றனா்.

வாக்கு சேகரிக்கும் பணியை தொடங்கிவிட்டோம். பிற மாவட்டங்களில் இருந்து வந்துள்ள கட்சி நிா்வாகிகளும் தீவிர வாக்குச் சேகரிப்பில் ஈடுபட்டுள்ளனா். தோ்தல் பணியில் எங்கள் வேகம், விவேகம் ஓரிரு நாள்களில் அனைவருக்கும் தெரியும். எங்களுக்குதான் இரட்டை இலை சின்னம் கிடைக்கும் என்றாா்.