ஈரோடு மாவட்டத்தில் இன்னும் 2 லட்சம் போ் முதல் தவணை கரோனா தடுப்பூசி செலுத்திக் கொள்ளவில்லை என சுகாதாரத் துறை அலுவலா்கள் தெரிவித்தனா்.

ஈரோடு மாவட்டத்தின் மொத்த மக்கள் தொகை 23 லட்சத்து 77 ஆயிரத்து 315. இதில் 18 வயதுக்கு மேற்பட்டவா்கள் 18 லட்சத்து 9 ஆயிரத்து 100. தற்போது மாவட்டத்தில் 18 வயதுக்கு மேற்பட்ட அனைவருக்கும் தடுப்பூசி செலுத்தப்பட்டு வருகிறது. திங்கள்கிழமை வரை மாவட்டத்தில் முதல் தவணை தடுப்பூசியை 16 லட்சத்து 5 ஆயிரத்து 936 போ் செலுத்திக் கொண்டுள்ளனா். இது 88.77 சதவீதமாகும்.

இரண்டாம் தவணை தடுப்பூசியை இதுவரை 11 லட்சத்து 76 ஆயிரத்து 538 போ் செலுத்திக் கொண்டுள்ளனா். இது 65.03 சதவீதமாகும். முதல் மற்றும் இரண்டாம் தவணைத் தடுப்பூசியை மொத்தம் இதுவரை 27 லட்சத்து 82 ஆயிரத்து 474 போ் செலுத்திக் கொண்டுள்ளனா்.

மாவட்டத்தில் முதல் தவணை தடுப்பூசியை 2 லட்சத்து 3 ஆயிரத்து 164 போ் இன்னும் செலுத்திக் கொள்ளவில்லை. இரண்டாம் தவணை தடுப்பூசியை இன்னும் 2 லட்சத்து 98 ஆயிரத்து 382 போ் செலுத்திக் கொள்ளவில்லை என சுகாதாரத் துறை அலுவலா்கள் தெரிவித்தனா்.