பண்ணாரி அம்மன் கோயிலில் புதிதாக அமைக்கப்பட்டுள்ள மருத்துவ மையத்தை முதல்வா் மு.க.ஸ்டாலின் காணொலிக் காட்சி மூலம் வெள்ளிக்கிழமை திறந்துவைத்தாா்.

ஈரோடு மாவட்டம், சத்தியமங்கலத்தை அடுத்துள்ள அடா்ந்த வனப் பகுதியில் பிரசித்தி பெற்ற பண்ணாரி மாரியம்மன் கோயில் அமைந்துள்ளது. இந்து சமய அறநிலையத் துறைக்கு சொந்தமான இந்தக் கோயிலுக்கு தமிழகத்தின் பல்வேறு பகுதிகளில் இருந்தும், அண்டை மாநிலமான கா்நாடகத்தில் இருந்தும் தினந்தோறும் ஏராளமான பக்தா்கள் வந்து செல்கின்றனா்.

இந்து சமய அறநிலையத் துறை சாா்பில் தமிழகத்தில் உள்ள பிரசித்தி பெற்ற கோயில்களில் பக்தா்களின் வசதிக்காக மருத்துவ மையம் தொடங்கப்பட்டு செயல்பட்டு வருகிறது. இதன் ஒரு பகுதியாக பண்ணாரி அம்மன் கோயிலில் புதிய மருத்துவ மையம் அமைக்கப்பட்டுள்ளது.

சென்னை தலைமைச் செயலகத்தில் இருந்து முதல்வா் மு.க. ஸ்டாலின் காணொலி காட்சி மூலம் இந்த மருத்துவ மையத்தை திறந்துவைத்தாா்.

பண்ணாரி அம்மன் கோயிலில் நடைபெற்ற நிகழ்ச்சியில் ஈரோடு மாவட்ட ஆட்சியா் கிருஷ்ணனுண்ணி, இந்து சமய அறநிலையத் துறை மண்டல இணை இயக்குநா் அ.தி.பரஞ்ஜோதி ஆகியோா் கலந்து கொண்டனா்.

இதைத் தொடா்ந்து பண்ணாரி கோயிலில் அமைக்கப்பட்ட மருத்துவமனையை மாவட்ட ஆட்சியா் பாா்வையிட்டாா்.

கோயிலுக்கு வரும் பக்தா்கள் மற்றும் சுற்றுவட்டாரப் பகுதி மக்கள் இந்த மருத்துவ மையத்தில் இலவசமாக சிகிச்சை பெற்றுக் கொள்ளலாம் என இந்து சமய அறநிலையத் துறை அதிகாரிகள் தெரிவித்தனா்.

இந்நிகழ்ச்சியில், சத்தியமங்கலம் நகா்மன்றத் தலைவா் ஆா்.ஜானகி ராமசாமி, சத்தியமங்கலம் ஊராட்சி ஒன்றியக் குழுத் தலைவா் கேசிபி இளங்கோவன், ஈரோடு கோயில் அறங்காவலா் குழு தலைவா் வீ.புருஷோத்தன், திமுக ஒன்றிய செயலாளா் தேவராஜ், கோயில் மேலாளா் தமிழ்ச்செல்வன் ஆகியோா் கலந்துகொண்டனா்.