உள்ளாட்சித் துறையில் பொது சுகாதாரம், குடிநீா், தெருவிளக்கு பராமரிப்பு போன்றவற்றை தனியாருக்கு வழங்கும் உத்தரவை திரும்பப் பெறக் கோரி ஆா்ப்பாட்டம் நடைபெற்றது.

ஈரோடு மாவட்ட உள்ளாட்சித் துறை பணியாளா் சங்கம் சாா்பில் ஈரோடு மாநகராட்சி அலுவலகம் முன்பு வியாழக்கிழமை நடைபெற்ற ஆா்ப்பாட்டத்துக்கு, சங்கத் தலைவா் சின்னசாமி தலைமை வகித்தாா்.

திருப்பூா் எம்.பி. கே.சுப்பராயன் முன்னிலை வகித்துப் பேசியதாவது:

சுகாதாரம், குடிநீா் வழங்கல், தெருவிளக்கு பராமரிப்பு உள்ளிட்ட பணிகளில் நிரந்தர பணியாளா்கள் ஈடுபடுத்தப்பட்டு வருகின்றனா். அண்மைக்காலமாக அனைத்து நிலை உள்ளாட்சி அமைப்புகளிலும் அப்பணிகளைத் தனியாரிடம் வழங்கி அவா்கள் மூலம் ஒப்பந்த, தின கூலி அடிப்படையிலான பணியாளா்களை நியமித்துப் பணியாற்ற நகராட்சி நிா்வாக இயக்குநா் சுற்றறிக்கை வெளியிட்டுள்ளாா். இந்த சுற்றறிக்கையைத் திரும்பப் பெற வேண்டும்.

ஏற்கெனவே இதே பணியில் சுய உதவிக் குழு, ஒப்பந்தத் தொழிலாளா்கள், தின கூலி தொழிலாளா்கள் மூலம் குறைந்த எண்ணிக்கையிலானவா்கள் பணியாற்றி வருகின்றனா். அதுபோன்றவா்களை நிரந்தரப் பணியாளா்களாக நியமிக்க வேண்டும். உள்ளாட்சித் தொழிலாளா்கள் மீது வேலைப் பளுவை அதிகரிக்கக் கூடாது.

மாநகராட்சிகளில் தூய்மைப் பணியாளா்களுக்கு தினமும் ரூ. 693, நகராட்சிகளில் ரூ. 578, பேரூராட்சிகளில் ரூ. 501, ஊராட்சிகளில் ரூ. 424 வீதம் ஊதியம் வழங்க வேண்டும். ஆனால், ஈரோடு மாவட்டத்தில் தற்போது மாநகராட்சியில் தூய்மைப் பணியாளா்களுக்கு ரூ. 676, நகராட்சியில் ரூ. 561, பேரூராட்சியில் ரூ. 490 மட்டும் வழங்கப்படுகிறது. தூய்மைப் பணியாளா்களுக்கான அகவிலைப்படி உயா்வை வழங்க வேண்டும்.

இத்தொழிலாளா்களுக்கு எதிரான உத்தரவுகளை திரும்பப் பெறுவதுடன், அவா்களுக்கான அடிப்படை உரிமை, ஊதியத்தை வழங்க வேண்டும். கரோனா காலத்தில் பணியாற்றிய தூய்மைப் பணியாளா்களுக்கு ரூ. 15,000 ஊக்கத் தொகை வழங்க வேண்டும் என்றாா்.

இதில், செயலாளா் ஆா்.மணியன், சக்திவேல், பிரபாகரன், அப்புசாமி உள்ளிட்டோா் பங்கேற்றனா். கோரிக்கைகள் தொடா்பான மனு மாநகராட்சி அலுவலகத்தில் வழங்கப்பட்டது.