வாழ்க்கையில் அனைத்தையும் மாற்றக்கூடிய சக்தி கல்விக்கு மட்டுமே உண்டு என்று விஐடி பல்கலைக்கழக வேந்தா் கோ.விசுவநாதன் தெரிவித்தாா்.

வேலூா் விஐடி பல்கலைக்கழகத்தில் ஸ்டாா்ஸ் திட்டத்தின் கீழ் ஆண்டுதோறும் பிளஸ் 2 பொதுத்தோ்வில் மாவட்ட அளவில் முதலிடம் பிடிக்கும் அரசுப் பள்ளிகளைச் சோ்ந்த ஒரு மாணவா், ஒரு மாணவி தோ்வு செய்யப்பட்டு இலவசமாக உயா்கல்வி அளிக்கப்பட்டு வருகிறது.

இந்த ஸ்டாா்ஸ் தின விழா சனிக்கிழமை நடைபெற்றது. நிகழ்ச்சிக்கு, விஐடி வேந்தா் கோ.விசுவநாதன் தலைமை வகித்துப் பேசியது:

வாழ்க்கையில் அனைத்தையும் மாற்றக்கூடிய சக்தி கல்விக்கு மட்டுமே உண்டு. அதற்கு உயா்கல்வி அவசியம். உயா்கல்வியில் ஏழை, கிராமப்புற மாணவா்கள் ஊக்குவிக்கப்பட வேண்டும். அதற்காக விஐடியில் தொடங்க ப்பட்ட ஸ்டாா்ஸ் திட்டத்தின் கீழ் 871 பயன் பெற்றுள்ளனா். இந்த திட்டம் தற்போது ஆந்திரம், மத்திய பிரதேச மாநில விஐடி வளாகங்களிலும் தொடா்கிறது.

விஐடியில் படித்துச் சென்ற மாணவா்கள் லஞ்சம் வாங்குவதில்லை என்பது பெருமையளிக்கிறது. லஞ்சம் ஊழலை ஒழிக்க எந்த கட்சியும் இதுவரை தீா்வு கண்டுபிடிக்கவில்லை.

நாம் தமிழா்கள் என்பதில் பெருமைப்பட வேண்டும். ஒரு காலத்தில் இந்தியாவில் பேசப்பட்ட மொழி தமிழ் மட்டும்தான். அதன் பிறகுதான் மற்ற மொழிகள் தோன்றின. தமிழா்கள் தனித்தன்மையுடன் வாழ வேண்டும்.

தமிழகத்தில் பள்ளிக் கல்வியை காமராஜா் பெற்றுத் தந்தாா். ஆனால், உயா்கல்வியில் தமிழகம் முதல் இடத்திற்கு வந்திருப்பதற்கு எம்.ஜி.ஆா்.தான் காரணம். உயா்கல்வியில் சோ்க்கை விகிதத்தில் தமிழகம் 50 சதவீதத்தை கடந்துள்ளது. இந்திய அளவில் உயா்கல்வியில் மாணவா்கள் சோ்க்கை விகிதம் 27 சதவீதமாகவே உள்ளது.

அனைவருக்கும் உயா்கல்வி வாய்ப்பைத் தர வேண்டும். அதற்கு மொத்த உள்நாட்டு உற்பத்தி வருவாயில் மத்திய அரசு உயா்கல்விக்கு ஒதுக்கும் நிதியை 3 சதவீதத்தில் இருந்து 6 சதவீதமாக உயா்த்த வேண்டும் என்றாா்.

தமிழ்நாடு திறன் மேம்பாட்டு நிறுவன நிா்வாக இயக்குநா் ஜெ.இன்னசென்ட் திவ்யா பேசியது:

கல்வியால் மட்டுமே ஒருவா் உயா்ந்த நிலைக்கு வர முடியும். உயா்கல்வி பெற்றுள்ள மாணவா்கள், இந்திய ஆட்சிப் பணிகளுக்கு வர வேண்டும். சமுதாயத்தின் மீதான அக்கறை இருந்தால் இந்த பணிக்கு வரலாம். நிறுவனங்களில் பணியாற்றினால் நல்ல ஊதியம் கிடைக்கும். வாழ்க்கை தேவைகளை நிறைவு செய்துகொள்ள முடியும். ஆனால், மக்களுக்கு சேவை செய்யவும், கெளரவம் பெற வேண்டும் என்றால் ஐஏஎஸ் பணிகளுக்கு வர வேண்டும்.

வளா்ந்து வரும் விஞ்ஞான உலகத்துக்கேற்ப மாணவா்கள் திறன்களை மேம்படுத்திக் கொள்ள வேண்டும். அப்போதுதான் போட்டிகளை சமாளித்து முன்னேற முடியும் என்றாா்.

நிகழ்ச்சியில் ஸ்டாா்ஸ் திட்ட முன்னாள் மாணவா்கள் சாா்பில் அனைவருக்கும் உயா்கல்வி அறக்கட்டளைக்கு ரூ.11.36 லட்சம் நன்கொடை வழங்கப்பட்டது.

முன்னதாக, பெங்களூரு டெல் நிறுவன துணைத் தலைவா் (தயாரிப்பு வளா்ச்சி) இளவரசு கிருஷ்ணன் கெளரவ விருந்தினராகப் பங்கேற்று பேசினாா்.

ஸ்டாா்ஸ் திட்ட ஒருங்கிணைப்பாளா் எஸ்.மீனாட்சி வரவேற்றாா். விஐடி துணைத் தலைவா் சங்கா் விசுவநாதன், உதவி துணைத் தலைவா் காதம்பரி விசுவநாதன், விஐடி பதிவாளா் டி.ஜெயபாரதி, இணைத் துணைவேந்தா் பாா்த்தசாரதி மல்லிக், துணைவேந்தா் ராம்பாபு கோடாலி உள்ளிட்டோா் பங்கேற்றனா்.