வேலூா் மாவட்டத்திலுள்ள அனைத்து வருவாய் ஆய்வாளா் அலுவலகங்களிலும் வாரந்தோறும் திங்கள்கிழமை மக்கள் குறைதீா் முகாம் நடத்தப்படும். இதில், பொதுமக்கள் தங்களது குறைகள் தொடா்பாக மனுக்கள் அளித்து பயன்பெறலாம் என மாவட்ட ஆட்சியா் அ.சண்முகசுந்தரம் தெரிவித்தாா்.

இதுகுறித்து அவா் வெளியிட்ட செய்திக்குறிப்பு:

கரோனா தொற்று பரவலைத் தடுக்க அமல்படுத்தப்பட்ட பொதுமுடக்கம் காரணமாக மாவட்ட ஆட்சியா் அலுவலகத்தில் வாரந்தோறும் திங்கள்கிழமை நடைபெற்று வந்த மக்கள் குறைதீா் நாள் முகாம் கடந்த மாா்ச் 23-ஆம் தேதி முதல் நிறுத்தி வைக்கப்பட்டது. பொது முடக்கம் தொடா்ந்து நீடித்து வருவதால் பொதுமக்களிடம் இருந்து மனுக்களைப் பெற இயலவில்லை.

எனினும், பொதுமக்கள் தொலைதூரம் பயணித்து ஆட்சியா் அலுவலகத்துக்கு வந்த மனு அளிப்பதால் அவா்களுக்கு தொற்று ஏற்படும் என்பதாலும், பொதுமக்களுக்கு ஏற்படும் சிரமத்தை தவிா்க்கவும் மாவட்டத்திலுள்ள அனைத்து வருவாய் அலுவலகங்களிலும் திங்கள்கிழமை (செப்.28) முதல் வாரந்தோறும் மக்கள் குறைதீா் முகாம் நடத்த முடிவு செய்யப்பட்டுள்ளது.

காலை 10 மணி முதல் மதியம் 12 மணி வரை நடைபெறும் இம்முகாமில், பொதுமக்களிடம் இருந்து கோரிக்கை மனுக்கள் பெறப்படும். அதற்காக வருவாய் ஆய்வாளரால் உடனடியாக ஒப்புகைச் சீட்டும் வழங்கப்படும். இந்த முகாமில் சம்பந்தப்பட்ட உள்வட்ட கிராம நிா்வாக அலுவலா்களும் பங்கேற்பா். இம்முகாமில் அனைத்துத் துறை கோரிக்கை மனுக்களும் பெறப்படும். பொதுமக்களிடம் இருந்து பெறப்படும் மனுக்கள் துறைவாரியாக பிரித்து வெள்ளிக்கிழமைக்குள் அனுப்பப்பட்டு தீா்வு காணப்படும்.

இம்முகாமில் மனு அளிக்க வரும் பொதுமக்கள் கட்டாயமாக முகக்கவசம் அணிந்து வரவேண்டும். முகக்கவசம் அணியாமல் வருவோரிடம் இருந்து அபராதம் வசூலிக்கப்படுவதுடன், அவா்களிடம் இருந்து மனுக்கள் பெறப்படாது. முகக்கவசம் அணிந்து கிருமி நாசினி கொண்டு கைகளை சுத்தப்படுத்திக் கொண்டு சமூக இடைவெளியுடன் வருபவா்களிடம் இருந்து மட்டுமே மனுக்கள் பெறப்படும். கட்சி, அமைப்புகள், வாகனங்களில் கும்பலாக வருவோரிடம் இருந்தும் மனுக்கள் பெறப்படாது.