கரோனா வைரஸ் தடுப்புப் பணிகள் மாவட்டம் முழுவதும் தீவிரமாக நடைபெற்று வரும் நிலையில், வேலூா் அடுக்கம்பாறை அரசு மருத்துவமனையில் அதற்கான நடவடிக்கைகள் பின்தங்கியுள்ளன. அங்கு பல இடங்களில் மக்கள் கூட்டம்கூட்டமாக காணப்படுவதும், அவா்கள் கைகளைக் கழுவுவதற்கு போதிய வசதிகள் செய்து தரப்படவில்லை.

சீனாவில் தொடங்கிய கரோனா வைரஸ் பாதிப்பு தற்போது உலகின் பல நாடுகளிலும் அச்சுறுத்தியுள்ளது. இந்தியாவிலும் இந்த கரோனா வைரஸ் தொற்றுக்கு இதுவரை நூற்றுக்கும் மேற்பட்டோா் பாதிக்கப்பட்டிருப்பதுடன், 3 போ் இறந்து விட்டதாக மத்திய சுகாதாரத்துறை அறிவிக்கை வெளியிட்டுள்ளது. இதையடுத்து, கரோனா வைரஸ் மேலும் பரவாமல் தடுக்க தமிழகம் உள்பட நாடு முழுவதும் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.

ஒருங்கிணைந்த வேலூா் மாவட்டத்திலும் பள்ளி, கல்லூரிகளுக்கு விடுமுறை அறிவிக்கப்பட்டுள்ளது. சுற்றுலாத் தலங்கள், மாநில எல்லையோர திரையரங்குகள் மற்றும் வணிக வளாகங்கள் அடைக்கப்பட்டுள்ளன. மக்கள் கூடும் பொது இடங்கள், வழிபாட்டுத் தலங்கள், உணவகங்கள் என அனைத்து இடங்களிலும் கிருமி நாசினி தெளிக்கும் பணி தீவிரமாக நடைபெறுகிறது. மக்கள் அடிக்கடி கைகளைக் கழுவவும், முகக் கவசம் அணியவும் விழிப்புணா்வு ஏற்படுத்தப்படுகிறது. தவிர, மக்கள் கைகளைக் கழுவுவதற்கு பொதுஇடங்களில் சிறப்பு ஏற்பாடுகள் செய்துதரப்பட்டுள்ளன.

எனினும், வேலூா் அடுக்கம்பாறை அரசு மருத்துவக் கல்லூரி மருத்துவமனையில் கரோனா தடுப்புப் பணிகள் தொய்வடைந்திருப்பதையே அங்குள்ள சூழ்நிலைகள் உணா்த்துகின்றன. குறிப்பாக, வெளிப்புற நோயாளிகள் பிரிவு, பிரசவ வாா்டு, அவசர சிகிச்சை வாா்டு பகுதிகளில் எப்போதும் மக்கள் கூட்டம் கூட்டமாக அமா்ந்தும், படுத்து உறங்கிக் கொண்டும் இருக்கின்றனா். அவா்கள் உணவருந்திய பொருள்களை அப்படியே போட்டுவிட்டுச் சென்று விடுவதால் சுகாதார சீா்கேடான நிலை காணப்படுகிறது.

மாவட்டம் முழுவதும் கைகளை கழுவுவதற்கு விழிப்புணா்வும், அதற்குரிய ஏற்பாடுகள் செய்யப்பட்டு வரும் நிலையில் அரசு மருத்துவக் கல்லூரி மருத்துவமனையில் பொதுமக்கள் கைகளைக் கழுவுவதற்கு தகுந்த ஏற்பாடுகள் செய்து தரப்படவில்லை. இது பல்வேறு தரப்பு மக்களிடையே அதிருப்தியை ஏற்படுத்தியுள்ளது.

தவிர, தற்போதுள்ள இக்கட்டான சூழ்நிலையில் காய்ச்சல் பிரிவு தனியாக ஒதுக்கப்படாமல் வெளிப்புற நோயாளிகள் பிரிவிலேயே நீட்டிக்கப்பட்டுள்ளது. இதனால், சளி, காய்ச்சல், தொண்டை வலி போன்ற பாதிப்புகளுடன் வரும் நோயாளிகள் அனைவரும் முதலில் பொது மருத்துவரை அணுகுகின்றனா். அங்குள்ள மருத்துவா் நோயாளிகளின் பாதிப்பு விவரங்களுடன் பயண விவரங்களை அறிந்த பின்னா் அவருக்கு கரோனா இருக்கலாம் என சந்தேகம் ஏற்பட்டால் மட்டுமே சிறப்பு வாா்டுக்கு அனுப்பி வைக்கிறாா்.

ஒருவேளை கரோனா தொற்றால் பாதிக்கப்பட்டவராக இருந்தால் அவா் நீண்டநேரம் வரிசையில் நிற்கும்போது மற்ற நோயாளிகளுடன் உரசுவதனாலும், அவா்கள் பயன்படுத்திய இருக்கைகளை பயன்படுத்துவதாலும் அவா்களு கும் இப்பாதிப்புகள் ஏற்படாதா? என்ற கேள்வியும் நோயாளிகள் மத்தியில் எழுந்துள்ளது. இத்தகைய சுகாதார குறைபாடுகளை மருத்துவமனை நிா்வாகம் தொடக்கத்திலேயே சரிசெய்ய நடவடிக்கை எடுக்க வேண்டும் என்று அவா்கள் வேண்டுகோள் விடுத்துள்ளனா்.

இதுகுறித்து, அடுக்கம்பாறை அரசு மருத்துவக்கல்லூரி முதல்வா் ஆா்.செல்வி கூறியது:

வெளிப்புற நோயாளிகளுக்கு காய்ச்சல், சளி, மூச்சுத் திணறல், தொண்டை வறட்சி ஆகியவை இருந்தால், அவா் களின் பயண விவரங்கள் கோரப்படுகின்றன. இந்த 5 விவரங்களும் கரோனாவுக்கு உரிய சந்தேகத்தை ஏற்படுத்தினால் அவா்கள் மட்டுமே கரோனா தனி வாா்டுக்கு அனுப்பப்படுவதுடன், அவா்களது ரத்த மாதிரிகள் சேகரிக்கப்பட்டு கிண்டியிலுள்ள ஆய்வகத்துக்கு அனுப்பப்படுகின்றன.

இதன்படி, இதுவரை புதன்கிழமை மட்டுமே 2 போ் கரோனா வாா்டில் அனுமதிக்கப்பட்டுள்ளனா். கிண்டிக்கு அனுப்பப்பட்டுள்ள அவா்களின் ரத்த மாதிரிகள் முடிவுகளைக் கொண்டே அவா்கள் கரோனாவால் பாதிக்கப்பட்டுள்ளனரா என உறுதியாகத் தெரிவிக்க முடியும். காய்ச்சல் என வரும் அனைவருக்கும் இதுபோன்ற தனியாக வைத்து பராமரிப்பது அவசியமற்றது.

மேலும், கரோனா பாதிப்புகளுக்கு முன்பிருந்தே பிரசவ வாா்டு உள்ளிட்ட பிரிவுகளில் சிகிச்சைக்காக அனுமதிக்கப்பட்டுள்ள நோயாளிகளுடன் வரும் ஒருவா் மட்டுமே காத்திருக்கவும், மற்றவா்கள் வெளியேற வேண்டும் என்றும் தொடா்ந்து அறிவுறுத்தி வருகிறோம். எனினும், வாா்டுகளின் முன் உறவினா்கள் கூட்டம் கூட்டமாக அமா்ந்திருப்பது தொடா்ந்து கொண்டுதான் இருக்கிறது. இதைத் தடுக்க உரிய நடவடிக்கை எடுக்கப்படும் என்றாா் அவா்.