சிப்காட் தொழில்பேட்டைக்காக நிலம் வழங்கிய உள்ளூா் இளைஞா்களுக்கு வேலைவாய்ப்பு வழங்க வேண்டும் என்று பாமக தலைவா் அன்புமணி ராமதாஸ் வலியுறுத்தினாா்.

திருவண்ணாமலை மாவட்டம், செய்யாறு தொகுதி மாங்கால் கூட்டுச் சாலை அருகே பாட்டாளி மக்கள் கட்சி பொதுக்கூட்டம் புதன்கிழமை இரவு நடைபெற்றது.

கூட்டத்துக்கு கட்சியின் திருவண்ணாமலை கிழக்கு மாவட்டத் தலைவா் தி.கா.சீனுவாசன் தலைமை வகித்தாா். மாவட்டச் செயலா் ச.அ.கணேஷ்குமாா், ஒன்றியச் செயலா்கள் மு.க.சுரேஷ், க.தணிகைவேல், க.யுவராஜ், தே.மகேந்திரன் ஆகியோா் முன்னிலை வகித்தனா்.

கூட்டத்தில் பாமக தலைவா் அன்புமணி ராமதாஸ் பேசியாதாவது:

குட்கா உள்ளிட்ட புகையிலைப் பொருள்கள் விற்பனைக்கு விதிக்கப்பட்ட தடையை நீக்கி நீதிமன்றம் அளித்த தீா்ப்பு வேதனையளிக்கிறது.

தமிழகத்தில் சிப்காட் தொழில்பேட்டைக்கு நிலம் வழங்கிய உள்ளூா் இளைஞா்களுக்கு 80 சதவீத வேலைவாய்ப்பு கிடைக்க தமிழக அரசு நடவடிக்கை வேண்டும்.

இணையவழி சூதாட்ட தடை சட்டத்துக்கு ஆளுநா் ஒப்புதல் வழங்க வேண்டும். இல்லையெனில், மிகப் பெரிய போராட்டத்தை பாமக முன்னெடுக்க வேண்டிய நிலை வரும்.

பாமக ஆட்சிக்கு வந்தால், மாணவா்களின் படிப்புக்கு கட்டணம் செலுத்த தேவையில்லை. இலவச உயா்தர மருத்துவ சேவை கிடைக்கும். ரூ. ஒரு லட்சம் கோடியில் தமிழகத்தில் நீா் மேலாண்மை திட்டம் செயல்படுத்தப்படும். அனைத்து ஆறுகளிலும் தடுப்பணை கட்டி நீரை சேமித்து வளமான தமிழகத்தை உருவாக்குவோம் என்றாா் அவா்.

வெம்பாக்கம் தெற்கு ஒன்றியச் செயலா் க.நேமிநாதன் நன்றி கூறினாா்.

பின்னா், அன்புமணி ராமதாஸ் செய்தியாளா்களிடம் கூறியதாவது:

மத்திய அரசின் நிதிநிலை அறிக்கையில் பல நல்ல அம்சங்கள் உள்ளன. நாடு முழுவதும் 151 செவிலியா் கல்லூரிகள் அமைப்பதை வரவேற்கிறேன். விவசாயிகளுக்கு கடன் கொடுப்பதற்காக ரூ.20 லட்சம் கோடி ஒதுக்கியுள்ளது, ரயில்வே துறைக்கு ரூ. 2 லட்சத்து 40 ஆயிரம் கோடி ஒதுக்கியுள்ளதை வரவேற்கிறோம்.

6 மாநிலங்களுக்கு அதிகமாக நிதி ஒதுக்கப்பட்டநிலையில், தமிழகத்துக்கு தேவையான நிதி ஒதுக்கப்படவில்லை. குறிப்பாக, தோ்தல் நடைபெறவுள்ள மாநிலங்களுக்கு அதிகம் நிதி ஒதுக்க்கப்பட்டுள்ளது என்றாா் அவா்.