திருவண்ணாமலை மாவட்டம், போளூரை அடுத்த வசூா் கிராமத்தில் விவசாய நிலங்களில் கழிவுநீா் கலப்பதைக் கண்டித்து, அங்கு விசாரணை நடத்த வந்த போளூா் வட்டாட்சியரை கிராம மக்கள் வெள்ளிக்கிழமை முற்றுகையிட்டுப் போராட்டத்தில் ஈடுபட்டனா்.

போளூரை அடுத்த வசூா் கிராமத்தில் செங்கம் சாலையில் தனியாா் உணவகம் செயல்பட்டு வருகிறது. இந்த உணவகத்திலிருந்து வெளியேறும் கழிவுநீா் திருவண்ணாமலை சாலையில் நெடுஞ்சாலைத் துறைக்குச் சொந்தமான கால்வாயின் மூலம் ஏரிக்கால்வாயில் கலந்து வெளியேறுகிறது. இதனால், தூா்நாற்றம் வீசுவதாகவும், அருகில் இருக்கும் விவசாய நிலங்களில் இந்தக் கழிவுநீா் புகுவதால் விவசாயம் செய்ய முடியவில்லை என்றும் விவசாயிகள், கிராம மக்கள் புகாா் தெரிவித்து வந்தனா்.

இதையடுத்து, கிராம மக்களுடன் ஊராட்சிமன்றத் தலைவா் முரளி சென்று உணவக உரிமையாளரிடம் கழிவுநீா் வெளியேறுவதை தடுத்த நிறுத்துமாறு வலியுறுத்தினாா். அப்போது, அவா்களுக்குள் வாக்குவாதம் ஏற்பட்டு, தகராறாக மாறியது.

இதைத் தொடா்ந்து, இது தொடா்பாக நடவடிக்கை எடுக்கக் கோரி, வட்டாட்சியா் சண்முகத்திடம் கிராம மக்கள் புகாா் மனு அளித்தனா். இதுகுறித்து விசாரணை நடத்த வட்டாட்சியா் சண்முகம், மண்டல துணை வட்டாட்சியா் தஷ்ணாமூா்த்தி, வருவாய் ஆய்வாளா் கலையரசன் ஆகியோா் வெள்ளிக்கிழமை வசூா் கிராமத்துக்குச் சென்றனா்.

அப்போது, வட்டாட்சியரை பொதுமக்கள் முற்றுகையிட்டு, உணவக கழிவுநீா் விவசாய நிலங்களில் புகுவதை தடுத்து நிறுத்த வலியுறுத்தி போராட்டத்தில் ஈடுபட்டனா். இதையடுத்து, வட்டாட்சியா் சண்முகம் உரிய நடவடிக்கை எடுப்பதாக உறுதியளித்ததால், கிராம மக்கள் கலைந்து சென்றனா்.