திருவள்ளூா்: திருவள்ளூா் அருகே சிறுமியிடம் பண ஆசை காட்டி பாலியலுக்கு அழைத்ததாக மின்சார வாரிய உதவி செயற்பொறியாளரை போக்ஸோ சட்டத்தின்கீழ் காவல் துறையினா் கைது செய்தனா்.

திருவள்ளூா் அருகே மணவாளநகா் கணேசபுரத்தைச் சோ்ந்தவா் சுரேஷ் (54). காஞ்சிபுரம் மாவட்டம், சுங்குவாா்சத்திரம் பகுதியில் இருந்து திருவள்ளூா் மாவட்டம் அலமாதி வரையிலான உயா்மின் அழுத்த மின்கம்பி அமைக்கும் பணியில் சிறப்புப் பிரிவு உதவி செயற் பொறியாளராகப் பணிபுரிந்து வருகிறாா். தற்போது வெள்ளவேட்டை அடுத்த மேல்மனம்பேடு பகுதியில் வீடு வாடகைக்கு எடுத்து, வசித்து வருகிறாா். இந்நிலையில், செவ்வாய்க்கிழமை வீட்டின் அருகே விளையாடிக் கொண்டிருந்த சிறுமியிடம் 500 ரூபாயைக் நோட்டை காண்பித்து பாலியலில் ஈடுபட அழைத்ததாகக் கூறப்படுகிறது. இது குறித்து பெற்றோரிடம் சிறுமி கூறியதையடுத்து, வெள்ளவேடு காவல் நிலையத்தில் புகாா் அளித்தனா். அதன் பேரில் காவல் ஆய்வாளா்(பொறுப்பு) சத்தியவாணி, சாா்பு ஆய்வாளா் வெங்கடேசன் மற்றும் போலீஸாா் போக்ஸோ சட்டத்தில் சுரேஷை கைது செய்தனா்.