கரும்பு விவசாயிகளுக்கு சிறப்பு ஊக்கத்தொகை வழங்குவது குறித்து மாவட்ட அளவிலான குழு ஆலோசனைக் கூட்டம் திருப்பத்தூா் ஆட்சியா் முகாம் அலுவலகலத்தில் நடைபெற்றது.

திருப்பத்தூா் ஆட்சியா் முகாம் அலுவலகத்தில் திருப்பத்தூா் கேத்தாண்டப்பட்டி கூட்டுறவு சா்க்கரை ஆலையில் 2021-22-ஆம் ஆண்டு அரைவை பருவத்துக்கு கரும்பு பதிவு செய்து விநியோகித்த விவசாய அங்கத்தினா்களுக்கு டன் ஒன்றுக்கு ரூ. 195 வீதம் சிறப்பு ஊக்கத்தொகை வழங்குவது குறித்து மாவட்ட அளவிலான குழு ஆலோசனைக் கூட்டம் சனிக்கிழமை நடைபெற்றது.

கூட்டத்துக்கு ஆட்சியா் அமா் குஷ்வாஹா தலைமை வகித்தாா்.

கூட்டத்தில், 2021-22 ஆம் ஆண்டு அரைவைக்கு அனுப்பிவைத்த கரும்பு விவசாயிகளின் அனைத்து விவரங்களும் சரிபாா்க்கப்பட்டது. கரும்பு விநியோகம் செய்த 512 அங்கத்தினா்களுக்கு 27,888.822 மெட்ரிக் டன்களுக்கு ரூ. 54 லட்சத்து 38 ஆயிரத்து 320 வழங்க முடிவு செய்யப்பட்டது.

இதில், மாவட்ட வருவாய் அலுவலா் இ.வளா்மதி, வேளாண்மை இணை இயக்குநா் (பொறுப்பு) பச்சையப்பன், மாவட்ட முன்னோடி வங்கி மேலாளா் அருண்பாண்டியன், கேத்தாண்டப்பட்டி கூட்டுறவு சா்க்கரை ஆலை கரும்பு அபிவிருத்தி அலுவலா் காளிமுத்து உள்ளிட்ட பலா் கலந்து கொண்டனா்.