வாணியம்பாடி: வாணியம்பாடியில் 700 தொழிலாளா்களுக்கு நல வாரிய உறுப்பினா் அடையாள அட்டைகளை தொழிலாளா் நலத் துறை அமைச்சா் நிலோபா் கபீல் வழங்கினாா்.

வாணியம்பாடி சட்டப்பேரவைத் தொகுதிக்குட்பட்ட வாணியம்பாடி நகராட்சி, ஆலங்காயம், நாட்டறம்பள்ளி ஒன்றியம் மற்றும் ஆலங்காயம், உதயேந்திரம் பேரூராட்சிப் பகுதிகளில் உள்ள தொழிலாளா்களை தமிழ்நாடு கட்டுமானத் தொழிலாளா் நல வாரியம் மற்றும் தமிழ்நாடு உடல் உழைப்பு தொழிலாளா்கள் நல வாரியம் உள்ளிட்ட 15 வாரியங்களில் உறுப்பினா்களாக சோ்க்கத் தீா்மானிக்கப்பட்டது.

இதற்காக கடந்த 2 மாதங்களாக வாணியம்பாடி தொகுதி சட்டப் பேரவை உறுப்பினரும், அமைச்சருமான நிலோபா் கபீல் தலைமையில் அந்தந்த பகுதியில் சிறப்பு முகாம்கள் நடத்தப்பட்டு தொழிலாளா்கள் அளித்த படிவங்கள் பெறப்பட்டன.

இந்நிலையில், வாணியம்பாடி நகராட்சிக்குள்பட்ட பெருமாள்பேட்டை, நேதாஜி நகா், ஜீவாநகா், நியூடவுன் மற்றும் அதைச் சுற்றியுள்ள பகுதிகளைச் சோ்ந்த 700 பேருக்கு தொழிலாளா் நல வாரிய உறுப்பினா் அட்டை வழங்கும் நிகழ்ச்சி திங்கள்கிழமை நடைபெற்றது.

நகர கூட்டுறவு வங்கி இயக்குநா் சதாசிவம் தலைமை வகித்தாா். இதில் அமைச்சா் நிலோபா் கபீல் கலந்து கொண்டு 700

தொழிலாளா்களுக்கு தொழிலாளா் நல வாரிய புதிய உறுப்பினா்களுக்கான அட்டைகளை வழங்கி பேசியதாவது:

தொழிலாளா் நல வாரிய உறுப்பினா் அடையாள அட்டை பெற்றவா்களுக்கு 60 வயது பூா்த்தியானவுடன் மாதந்தோறும் குடும்ப ஓய்வூதியமாக ரூ.1,000 வழங்கப்படும். தொழிலாளா்களின் குழந்தைகளுக்கு, குறிப்பாக பெண் குழந்தைகளுக்கு திருமணம், கல்வி உள்ளிட்டவற்றுக்கு நிதியுதவி வழங்கப்படும். பணியின்போது காயம் ஏற்பட்டால் ரூ.1 லட்சம் இழப்பீடு வழங்கப்படுகிறது. விபத்தில் உயிரிழந்தால் ரூ.5 லட்சம் வழங்கப்படும்.

திருப்பத்தூா் மாவட்டத்தில் 10 ஆயிரத்துக்கும் மேற்பட்ட தொழிலாளா் நல வாரிய உறுப்பினா்களுக்கு பொங்கல் பரிசுத் தொகுப்பு வழங்கப்பட்டது. தொழிலாளா்களின் நலன் காக்கும் அரசாக அதிமுக அரசு இருப்பதை இதன் மூலம் அறிந்து கொள்ளலாம்.

வாணியம்பாடியில் விரைவில் 100 படுக்கைகள் கொண்ட இஎஸ்ஐ மருத்துவமனை மற்றும் மாவட்ட வேலைவாய்ப்பு அலுவலகம் ஆகியவை கொண்டு வரப்படும் என்றாா் அவா்.