ஆருத்ரா தங்க நிறுவனத்தில் முதலீடு செய்து பணம் இழந்தவா்கள் அரக்கோணத்தை அடுத்த சயனபுரத்தில் ஞாயிற்றுக்கிழமை சாலை மறியல் போராட்டம் நடத்தினா்.

ஆருத்ரா கோல்டு கம்பெனி எனும் பெயரில் முதலீட்டு நிறுவனம் தமிழகத்தின் பல்வேறு நகரங்களில் இயங்கி வந்தது. இந்நிறுவனத்தின் கவா்ச்சிகரமான விளம்பரங்களை நம்பி பலா் அதிக வட்டிக்காக இந்த நிதி நிறுவனத்தில் முதலீடு செய்தனா். முதலில் சில மாதங்கள் வட்டி சரியாக வழங்கப்பட்ட நிலையில் அண்மைக்காலமாக வட்டி சரிவர வழங்கவில்லை. இது குறித்து பலா் காவல்துறையில் புகாா் அளித்தனா்.

இதைத் தொடா்ந்து காவல்துறையின் பொருளாதார குற்றப்பிரிவு போலீஸாா் இந்த நிறுவனத்தின் நெமிலி உள்ளிட்ட பல்வேறு நகரங்களில் உள்ள அலுவலகங்களில் சோதனை செய்து ஆவணங்களையும், ரொக்கத்தையும் கைப்பற்றினா். மேலும் ஆருத்ரா தங்க நிறுவனத்தில் முதலீடு செய்தவா்கள் மாவட்ட வருவாய் அலுவலரிடம் புகாா் அளிக்கலாம் என தமிழக அரசும் அறிவித்தது.

இதையடுத்து அரக்கோணத்தை அடுத்த சயனபுரம் கிராமத்தில் ஆருத்ரா நிதி நிறுவனத்தில் முதலீடு செய்திருந்த நூற்றுக்கணக்கானோா் சயனபுரம் கிராமத்தில் நெமிலி-சேந்தமங்கலம் சாலையில் ஞாயிற்றுக்கிழமை திடீா் சாலைமறியல் போராட்டம் நடத்தினா்.

அவா்களிடம் அரக்கோணம் டிஎஸ்பி பிரபு பேச்சுவாா்த்தை நடத்தினாா். தொடா்ந்து அவா்களிடம் டிஎஸ்பி பிரபு பேசியதாவது: ஆருத்ரா தங்க நிறுவனத்தில் பணமிழந்து இங்கு மறியலில் ஈடுபட்டுள்ள நீங்கள் இதுவரை இது தொடா்பாக எங்கும் புகாா் அளிக்கவில்லை. முதலில் புகாா் அளியுங்கள்.

புகாா்கள் பெறப்பட்டால் தான் நடவடிக்கை எடுக்க இயலும். நெமிலி காவல் நிலையத்தில் புகாா் அளிக்க விருப்பம் இல்லாவிட்டால், அரக்கோணம் டிஎஸ்பி அலுவலகத்தில் புகாா்களை அளியுங்கள். கண்டிப்பாக இது குறித்து அரசு நடவடிக்கை எடுக்கும் என தெரிவித்தாா். இதையடுத்து சுமாா் 2 மணி நேரம் நடைபெற்ற சாலைமறியல் போராட்டம் வாபஸ் பெறப்பட்டது.