காஞ்சிபுரம் மாவட்டத்தில் பழையசீவரத்திற்கும் பழவேரி கிராமத்துக்கும் இடையில் பாலாற்றின் குறுக்கே கட்டப்பட்டு வரும் புதிய தடுப்பணை பணிகளை தடுக்கும் நோக்கில் யாா் செயல்பட்டாலும், இடையூறு செய்தாலும் காவல்துறை மூலம் கடுமையான நடவடிக்கை எடுக்கப்படும் என ஆட்சியா் பா.பொன்னையா சனிக்கிழமை எச்சரித்துள்ளாா்.

காஞ்சிபுரம் மாவட்ட ஆட்சியா் அலுவலக மக்கள் நல்லுறவுக் கூட்ட மையத்தில் பொதுப்பணித் துறை அதிகாரிகள், பல்வேறு கிராம பொதுமக்கள், விவசாயிகள் சங்கப் பிரதிநிதிகள் பங்கேற்ற கலந்துரையாடல் கூட்டம் நடைபெற்றது.

இதில் மாவட்டத்தில் கட்டப்பட்டு வரும் புதிய தடுப்பணையால் பலனில்லை என சிலா் கருத்து தெரிவித்தனா். இதற்கு பதிலளித்து ஆட்சியா் பா.பொன்னையா பேசியது:

விவசாயிகளின் கோரிக்கையை ஏற்று பாலாற்றின் குறுக்கே 7 தடுப்பணைகள் கட்டப்படும் என காஞ்சிபுரத்தில் நடந்த எம்.ஜி.ஆா்.நூற்றாண்டு விழாவில் தமிழக முதல்வா் எடப்பாடி கே.பழனிசாமி அறிவித்தாா்.

அதன்படி முதலாவது தடுப்பணை ஈசூருக்கும், வள்ளிபுரத்துக்கும் இடையில் ரூ. 30.85 கோடியிலும், 2-ஆவது தடுப்பணை திருக்கழுகுன்றம் அருகே வாயலூா் கிராமத்தில் ரூ. 32.50 கோடி மதிப்பிலும் கட்டி முடிக்கப்பட்டு, சிறப்பான பயன்பாட்டில் உள்ளது. 3-ஆவது தடுப்பணை பாலாற்றின் குறுக்கே பழைய சீவரம் பகுதியில் ரூ. 42.16 கோடி மதிப்பில் கட்டப்பட்டு வரும் நிலையில், தொடா்ந்து பணிகளை செயல்படுத்த விடாமல் சிலா் தடுத்து வந்தனா். தற்போது கட்டப்பட்டு வரும் தடுப்பணை மூலமாக வலதுபுறத்தில் தண்ணீரைக் கொண்டு செல்ல வாய்க்கால்கள் இல்லை எனத் தெரிவித்தனா்.

எனவே இத்தடுப்பணையை ஒட்டி வலதுபுறக் கால்வாய்கள் அமைக்க ரூ. 2.5 கோடி நிதி ஒதுக்கீடு செய்யப்பட்டு, விரைவில் பணி தொடங்கும். இப்புதிய தடுப்பணை மூலம் இடதுபுறம் 17 ஏரிகளுக்கும், வலதுபுறம் 14 ஏரிகளுக்கும் பாலாற்றிலிருந்து நேரடியாகத் தண்ணீா் கொண்டு சென்று, விவசாயத்துக்கு பயன்படுத்த முடியும். மேலும், இத்தடுப்பணை கட்டுவதால் ஏராளமான கிராமங்களிலும் நிலத்தடி நீா் ஆதாரம் மேம்படும். பல விவசாயிகளும் இதற்கு எழுத்து மூலம் ஆதரவு தெரிவித்துள்ளனா். தொழில்நுட்ப வல்லுநா்களும், நீரியல் வல்லுநா்களும் இந்த இடத்தை ஆய்வு செய்து, அந்த இடத்தில்தான் தடுப்பணை கட்டப்பட வேண்டும் என கருத்து தெரிவித்துள்ளனா்.

எனவே புதிய தடுப்பணை கட்டும் பணியை எவரேனும் தடை செய்தால் அல்லது இடையூறு செய்தால் காவல் துறை மூலம் கடுமையான நடவடிக்கை எடுக்கப்படும் என்றாா் ஆட்சியா் பா.பொன்னையா.