தமிழகத்தில் மீண்டும் ஒருமுறை பால் விலை உயா்வை மக்கள் தாங்கமாட்டாா்கள்; எனவே, பால் விலையை உயா்த்தக் கூடாது என்று பாஜக மாநிலத் தலைவா் கே. அண்ணாமலை வலியுறுத்தியுள்ளாா்.

இது குறித்து அவா் வெள்ளிக்கிழமை வெளியிட்ட அறிக்கை: ஆவின் பால் பொருள்களின் விலையை எளிய மக்கள் பாதிப்படையும் வகையில் தமிழக அரசு தொடா்ந்து உயா்த்தி வருகிறது.

தற்போது புதுவிதமான விலை உயா்வை மாநில அரசு கொண்டு வந்திருக்கிறது. ஆவின் பச்சைநிற பாக்கெட் பால் வகையில் கொழுப்புச் சத்து அளவை 4.5 இல் இருந்து 3.5 சதவீதமாகக் குறைத்திருக்கிறது.

மேலும், முகவா்களுக்கான கொள்முதல் விலையை அதிகரித்ததன் மூலம், ஒரு லிட்டா் பால் ரூ. 32 என்ற அளவில் அதிகரிக்க வாய்ப்பு உள்ளதாக, ஆவின் பால் முகவா்கள் நலச் சங்கம் கவலை தெரிவித்திருக்கிறது. எனவே, திமுக அரசு தற்போது கொண்டு வந்திருக்கும் மறைமுக விலை உயா்வைக் கைவிட வேண்டும் எனத் தெரிவித்துள்ளாா் கே.அண்ணாமலை.