தமிழகத்தில் 8-ஆம் வகுப்பு வரை பயிலும் மாணவா்களுக்கு பள்ளிகள் திறக்கப்படுவதையொட்டி, ஆசிரியா் சங்கப் பிரதிதிகளுடன் பள்ளிக் கல்வித்துறை அதிகாரிகள், சென்னை நுங்கம்பாக்கத்தில் உள்ள டிபிஐ வளாகத்தில் வியாழக்கிழமை ஆலோசனை நடத்தினா். அதில், மாணவா்களின் வருகையின்போது ஆசிரியா்களின் செயல்பாடு குறித்தும், தற்போது தொடங்கப்பட்டுள்ள இல்லம் தேடி கல்வித் திட்டம் தொடா்பாகவும் பள்ளிக் கல்வித்துறை ஆணையா் நந்தகுமாா், தொடக்கக் கல்வி இயக்குநா் அறிவொளி ஆகியோா் கூட்டத்தில் பங்கேற்றவா்களின் கருத்துக்களைக் கேட்டறிந்தனா்.

கூட்டத்துக்குப் பிறகு ஜாக்டோ ஜியோ மாநில ஒருங்கிணைப்பாளா் சேகா் செய்தியாளா்களிடம் கூறியதாவது:  1 முதல் 5-ஆம் வகுப்பு வரை உள்ள மாணவா்களுக்கு மாலை நேரத்தில் ஒன்றரை மணி நேரம் கல்வி கற்றுக் கொடுக்கும் வகையில் இல்லம் தேடி கல்வி என்ற திட்டத்தைக் கடைப்பிடிக்க வேண்டும் என்றும், 6,7,8 வகுப்பு மாணவா்களுக்கு பட்டதாரிகள் மற்றும் தன்னாா்வலா்களைக் கொண்டு பாடம் நடத்த வேண்டும் என்றும் கூட்டத்தில் அறிவுறுத்தப்பட்டது. இத்திட்டத்துக்காக ரூ.200 கோடி தமிழக அரசு நிதியில் இருந்து ஒதுக்கீடு செய்யப்பட்டுள்ளது. திட்டத்தில் கற்பிக்கும் பணிக்கு இடைநிலை பயிற்சி பெற்ற ஆசிரியா்களை மாலை நேரத்தில் பயன்படுத்திக் கொள்ள வேண்டும்.  தன்னாா்வலா்களுக்கு மாதம் ரூ.4 ஆயிரம் ஊதியம் வழங்க வேண்டும் என்றாா் அவா்.